Khawthlang Kristian te ngaih pawimawh 'Halloween'

October 31 zan kha Kris­tian te tana zan pawimawh tak pakhat a ni a, a hmingah 'Halloween' an vuah. Hallo­ween hi All Saints Day urlawk zan a ni ber a, a bikin khawthlang lama Kristian te chuan an la urhsun ṭhin hle.

A ṭobul

Halloween hi All Hallows' Evening lam tawi a ni a, mi­thiang­hlim puala hun an hman ṭhin hma zan a ni. November 1 hi All Saints Day a ni a, Roman Catholic leh Orthodox Kohhran te chuan he ni hi urhsûn takin an hmang ṭhin. He hun hi mitthi tawh te, mithianghlim kal ta te, martar te leh rinnaa rinawm famta te hriatreng nana hman ṭhin a ni.

Halloween rawn chhuahna hi Celtic ho buh seng kût aṭanga inṭan nia ngaih a ni a, ṭhenkhat chuan Celtic ten an tihdan leh Kristian te lo chin ṭhin chawh­pawlh chhoh niin an ngai thung.

Kohhran din tirh aṭang tawhin hunpuite chu a hma zan aṭanga hman lawk a ni a, chungte chu Krismas, Easter, Pentecost leh All Saints' Day te hi a ni. Hengte hi a hlawma sawi nan Hallowmas an ti ṭhin bawk. All Saints' Day (November 1) hma zan, October 31 chu Halloween atan hman a ni ta a ni.

Symbol

Halloween-a artifact leh symbol lar zingah chuan Jack o' Lantern hi a lar ber chu a ni. Mai pum - mit leh ka neia ker niin, a chhungah mei an chhi ṭhin. Hei hi hmanlai aṭanga an chîn ṭhin a ni a, thlarau sualte hlauh atana siam niin an sawi.

Irish-ho thawnthuah chuan Jack O' Lantern hian thlarau pakhat, vanramah pawh, hrem­hmunah pawh a kal an phalsak loh ve ve ai a awh a ni, an ti bawk.

Hetih lai hian Ireland leh Scotland-ah chuan bul-uih (turnip) hi hmanlai aṭang tawha an hman ṭhin a ni a, North America-a pem thla ten mai hi an hmang lar ta thung a ni. Tunhnuah hian luruh ro an tilar hle bawk a, hei hi a lo chhuahna tak chu Isua an khenbehna tlang, Golgotha aṭang leh Kristian inzirtirna aṭangin a ni. Luruh hian mihring nunin a daih rei lohzia a entir niin an sawi. Sava hlauh (scarecrow) te hi chu a hnu deuha chîn uar chauh niin a lang.

Entertainment huangah

Halloween hi sakhuana thil nisi in, enter­tainment khawvel lamah an la vawng tawh zawk emaw tih tur a ni. Halloween-ah hian mak­sak tak takin an inchei ṭhin a, a bikin milarten an intihhmuh nasa hle. Hemi denchhen hian party leh intihhlimna an buatsaih ṭhin a, social media lamah pawh thlalak maksak tak tak hmuh tur a tam hle.

Kuminah hian Kardashian chhungkua te chu Halloween hmang uar ber tih ngam an ni a, party buatsaihin maksak tak takin an inchei a ni. Anni bakah hian Heidi Klum, Rihana, Rita Ora, Spice Girl member Mel B te chu a an langsar viau bawk a, American singer Robin Thicke chu a phusa pawlah a ṭang bawk.

Beyoncé leh Jay-Z pawh an bang bik lo a, Joe Jonas leh Sophie Turner pawh tute nge an nih hriat harsa khawpin an inchei bawk.