Mitthi tawh zinga sum lalut hnem ber Michael Jackson
Forbes Magazine chuan mitthi tawh zinga sum lalut hnem zual a tarlang leh ta a, American singer Michael Jackson khum zo an awm lo. Michael Jackson hian kum khat chhungin $mtd 400 zet a la lalut hem mai a, a zawna kum ruk chhung dinhmun sang ber a luahna chiah a ni bawk.
Michael Jackson hian Elvis Presley leh Bob Marley te khumin dinhmun sang ber hi a luah a, mi bik a nih zia a tarlang nawn zel. A hringa hranin awm tawh lo mah se, a sulhnu hnutchhiah ropui tak chuan sum ṭhahnem tak a la hailut reng a ni. Kum khat chhunga a sum lakluh $mtd 400 hi a namai lo hle a, dam lai zingah pawh khawvel huapa milar kan tih tam takin an tluk lo hle.
'King of Pop' a ropui
'King of Pop' an tih mai Michael Jackson hi mi tam tak chuan 'ropui ber' ti hiala an chhal ṭhin a ni a, a sulhnu en pawhin thil mak a ni lo. Kum 2009-a boral Michael Jackson hian a ropuina zawng zawng mual a liampui lo tih a lang a, a sum lakluh pawh hi a sang fal hle a ni.
Amah hnaih bertu Elvis Presley chuan $mtd 40 a thawk chhuak a, an sum lakluh a inthlau hle. Hei erawh hria ila - Elvis Presley hi kum 1977 daih tawha boral a ni a, heti zat sum a la hui thei a nih avangin dahniam chi rual a ni lo.
American professional golfer lar Arnold Palmer chuan a thih hnuah kum khat chhungin $mtd 35 lai a la thawk chhuak a, sum lalut tam pathumna a ni. Palmer hi kum 2016 daih tawha boral niin, ani pawh hi mibik zingah chhiar tel loh theih loh a ni.
Kum 2000-a chatuan ram pan American cartoonist lar Charles M. Schulz chuan $mtd 34 zet a la lalut bawk a, Bob Marley chuan $mtd 23 lalutin a dawt. Jamaican singer ropui Bob Marley hian 1981 khan khawvel a chhuahsan a, mi tam tak ngaihsan rawn a ni.
Marilyn Monroe
Milar famta zinga sawi zui hlawh leh tun thlenga mi tam takin a chanchin an la ngaihven chu Marilyn Monroe hi a ni. He American film star chhe lo zet mai hian ngaisangtu a ngah a, ṭhangthar zingah pawh a 'style' copy hmuh tur an la kat nuk a ni.
Marilyn Monroe hi August 5, 1962 khan kum 36 mi chauh niin a thi a, khawvel a barakhaih hle. A thih aṭanga kum 50 chuang a liam hnu pawhin sum ala thawk chhuak hnem rem rem hle a, kum khat chhunga a lakluh chauh pawh $mtd 14 zet a la tling a ni.
Kum khat chhunga sum lalut tam zual zingah hian American author Dr. Seuss pawh a tel a, $mtd 16 zet a la thawk chhuak thei a ni. Marilyn Monroe hi a thih hnuah pawh a sam zai thlengin an lilam a, sum tam tak sengin an la inchuh luih luih a ni!
Top 10-ah hian American author lar Dr. Seuss leh sumdawng hausa Hugh Hefner te pawh an lang. Anni bakah hian zaithiam lar Prince leh John Lennon te chu sum lalut tam zual zingah hian an tel bawk.
Hetih lai hian kumin June thla-a boral American rapper XXXTentacion chu sum lalut tam zingah hian a lang phak a, 11-na a ni.
Sum lalut hnem zual te :
1. Michael Jackson - $mtd 400
2. Elvis Presley - $mtd 40
3. Arnold Palmer - $mtd 35
4. Charles Schulz - $mtd 34
5. Bob Marley - $mtd 23
6. Dr. Seuss - $mtd 16
7. Hugh Hefner - $mtd 15
8. Marilyn Monroe - $mtd 14
9. Prince - $mtd 13
10. John Lennon - $mtd 12