IFPI 2021 Album Charts thununtu Adele

International Federation of the Phonographic Industry (IPFI) chuan global albums charts 2021 tichhuakin chart thununtu chu tudang ni loin British singer Adele a ni a, nikuma a album tlangzarh '30' chu pakhatna a ni.

British pop singer hian '30' hmang hian chart-ah ro a rel a ni satliah loa, album format hrang hrang pathumah chart topper a ni vek!

Adele '30' hi Global Album All Format Chart-ah pakhatna a ni a, Global Album Sales Chart leh Global Vinyl Album Chart-ah pakhatna a ni bawk.

He album hi a ropui bikna em em chu kum tawp dawn aruaia a tlangzarh a ni a, nikum November 19-a a tlangzarh chauh kha niin, thla hnih em pawh ni loah kumtir aṭanga album lo tlangzarh tawh zawng zawngte a rawn khum ta vek a ni. A tlangzarh tirhah khan ram 20 vel zetah chart topper a nihpui a, chung zingah chuan music industry hlawkna hmunpui US leh UK pawh a tel.

IFPI-in an tarlan dan chuan thla khat leh a chanve pawh tling lo chhungin Adele hian '30' hi copy maktaduai nga (physical-in) a hralh hman a ni.

Artist che ṭha dangte chu
Global Album All Format Chart-ah hian Olivia Rodrigo chu 'SOUR' hmangin pahnihna a ni thung a, nikum chhunga a lar zia kan hria a, Adele hian album rawn tlangzarh lo phei se chu Olivia Rodrigo chungchang pawh hi hahipa sawi tham a ni ngei ang.

Pathumna chu tudang ni loin a naupan lai aṭanga rimawi khawvelin a ngaihven tawh Justin Bieber a ni a, album hit 'Justice' chu pahnihna a nihpui.

Ed Sheeran '=' chu palina ni thungin The Weeknd 'After Hours' chu pangana a ni bawk.

Global Album All Format Chart hian album format zawng zawng a huam vek a, a copy pangngai, digital download leh streaming service-a stream a nih dan zawng zawngte a huam vek a ni.

Top 10 Global Album
All Format Chart 2021:-
1. Adele 30
2. Olivia Rodrigo SOUR
3. Justin Bieber Justice
4. Ed Sheeran =
5. The Weeknd After Hours
6. Dua Lipa Future Nostalgia
7. The Kid LAROI F*CK LOVE (Mix Tape)
8. ABBA Voyage
9. Morgan Wallen Dangerous:
The Double Album
10. Doja Cat Planet Her