Dua Lipa 'Levitating' Mi hla entawnin an phuah em ni?

Dua Lipa an khing tlat mai!

English singer Dua Lipa hla hit 'Levitating' chu Florida reggae band Artikal Sound System chuan kum 2017-a an tihchhuah 'Live Your Life' entawna an siam niin an puh.

Artikal Sound System hian Los Angeles federal court-ah copyright infringement thubuai 'Levitating' chungchangah hian an thehlut a ni. Billboard-in an tarlan dan chuan an thubuai thehluhah hian thu tam an ziak loa, Dua Lipa-i'n an hla a copy dan chungchang tawite ziak langin hla pahnih chu an inan em avangin 'Levitating' chu anmahni irawm chhuaka an phuah nia a lan loh thu an ziak a ni.

Lipa, Clarence Coffee Jr., Sarah Hudson, leh Koz-te hla phuah 'Levitating' hi Dua Lipa studio album pahnihna kum 2020-a tlangzarh 'Future Nostalgia'-a mi kha niin a lar rem rem hle a, Billboard Hot 100 chart-ah pahnihna hial a nih bakah kar 68 zet chu he chart-ah hian a cham nghe nghe.

He hla hi Billboard chuan nikum chhunga No. 1 Billboard Hot 100 Song of the Year-ah a lo puang tawh nghe nghe a, hmeichhe artist hla sak Hot 100 chart top 10-a lang rei ber record hial pawh a lo siampui tawh bawk.

Artikal Sound System hi reggae band niin South Florida lam chhuak an ni a, Dua Lipa-i'n an hla a ru nia an puhna 'Live Your Life' hi kum 2017-a an tihchhuah EP 'Smoke and Mirrors'-a mi a ni thung.