Arini hla thar 'Luiral mawi' zaninah

Praise On star R Lalrinmawii (Arini) chuan zanin hian hla thar 'Luiral mawi' a tichhuak dawn.

Mizo Gospel singer kan neih ṭhat ber zinga mi Arini hian kuminah hla thar a la tichhuak loa, 'Luiral mawi' hi kumina a hla hmasa ber tur niin zanin hian Zonet lamah a chhuak anga, YouTube lamah pawh duh hun huna thlira ngaihthlak theihin a awm thuai ang.

He hla hi Arini û, 'Pathian hmangaihna' album hla ṭha tak tak awmna buatsaihtu Fela phuah bawk a ni leh a, a mawiin a thu a ṭha leh viau ang tih a rinawm. Fela hian nikum khan hla phuah mawi tak 'A nung ka hria', Arini bawkin a sak hmangin Ṭhazual award-ah khan Best Songwriter Gospel award a dawng tawh a ni.

Music chu Lal K Sailo kut chhuak a ni a, Masky Records-ah recording chu tiin video chu Chiangtea Videography a ni thung.

'Luiral mawi' hi Pathian fakna hla, Vanram thlen hunah chuan khawvel ngai tawh loin Pathian kiangah thlamuang taka kan chawlh tawh tur thu leh Pathian kianga chen ve a nghahhlelhawm zia puan chhuahna hla a ni a, Arini zai ngainatute tan chuan hmaih chi a ni lo ang.