Olivia Rodrigo kutah Billboard Woman of the Year 2022 chawimawina

Billboard 2022 Women In Music event chu puanzar lawk angin YouTube Theater, Inglewood, California-ah Nilaini khan buatsaih a ni ta. He hunah hian rimawi khawvela hmeichhe artist chawimawi phû tak takte chawimawi niin nikum lawk aṭanga rimawi khawvelin a hmelhriat Olivia Rodrigo kutah Billboard Woman of the Year 2022 chawimawina chu hlan a ni ta a ni.

Olivia Rodrigo hian a hla hit 'Deja Vu' hmangin show a hawng a, chumi hnu deuhah chuan Woman of the Year chawimawina chu Sheryl Crow-i'n fakna thu mawi tak nen a hlan.

'Drivers license' hitmaker chuan Sheryl Crow fan a nih thu leh Billboard hnena a lawm thute a sawi a, Woman of the Year-a puan a ni chu chawimawina ropui tak a nih thute a sawi bawk. "Hei hi(zai) ka hna a ni tih sawi theia ka awm hi ka vannei hle ani tih ka ngaihtuah loh ni reng a awm lo. 

Naupangte ka nih lai aṭangin hla ka phuah tawh a, ka nuam tih ber a nih tak zet bakah ka rilru ka puanchhuahna pawh a ni. Hla phuah nuam ka tih chhan ber chu titinaa ka sawi chhuah theih aia chiang leh dik zawnkin ka ngaihtuahnate ka puang chhuak thei hi a ni. Hla phuah hi ka tan chuan engkim a ni a, chuvang chuan rimawi hmanga midang nena kan inpawh thei hi ka duhthusam puitlinna niin ka lawm tak zet e," tiin a sawi.

Olivia Rodrigo hi he chawimawina dawng thei 15-na a ni chiah a, kum khat vel awrh chiah rimawi khawvela sulhnu la hnutchhuah mah se hmeichhiate chawimawina bik Billboard-in a buatsaih ṭhina chawimawina ngaihhlut ber chu a dawng ta a ni.

Award dawngtu dangte sawi lang zuai ang
Billboard 2022 Women In Music event-a chawimawina dawng tute hi puanzar lawk vek a ni a, mi tam tak chuan an chawimawina dawn tur hi kan hre tawh hial ang.

Rising Star Award award chu country singer Gabby Barrett kutah hlan a ni a, Rulebreaker Award chu karol G-in dawng thungin Phoebe Bridgers chuan Trailblazer Award a dawng ve bawk.

Billboard 2022 Women In Music award dawngtute:-

Woman of the Year Award
- Olivia Rodrigo

Rising Star Award
- Gabby Barrett

Rulebreaker Award
- Karol G

Trailblazer Award
- Phoebe Bridgers

Chart-Topper Award
- Summer Walker

Icon Award
- Bonnie Raitt

Impact Award
- H.E.R

Powerhouse Award
- Doja Cat

Game Changer Award
- Saweetie

Executives of the Year
- Golnar Khosrowshahi

"Hmeichhia la naupang tak tan chuan music industry hi a awlsam reng loa, mahse ka hmaa lo lak tawh hmeichhe hla phuah thiamte leh zai thiamte aṭangin chakna tam tak ka neih phah a, keimah ang hmeichhia la naupang zawk tan kawng an lo sial a ni...

An journal leh an bedroom chhuata ni tina an hla phuah ziak chhuak ṭhintu hmeichhe naupang zawng zawngte hnenah hei hi ka sawi duh a i, in hlutna leh in themthiamn bakah in huaisenna zawng zawng khan min hneh hle bawk..." - Olivia Rodrigo (Billboard Woman of the Year 2022)