Sexiest Man Alive 2020 Michael B. Jordan

Black Panther Actor Michael B. Jordan chuan PEOPLE's Sexiest Man Alive club a zawm ve thei ta. Creed actor hi People magazine chuan kumin atana mipa sexy berah a thlang a ni.

Thawhlehnia 'Jimmy Kimmel Live!' show-ah khan hemi chungchang hi tarlan niin People's Sexiest Man Alive 2020 chu Michael B. Jordan hi a nih thu puanzar a ni a, an magazine cover-ah pawh a thlalak a chuang nghal vang.

Kum 33 mi producer leh actor ni bawk chuan cover story-ah hian People's Sexiest Man Alive 2020-a thlan a ni chu 'cool feeling' tia sawiin a nu leh pa chuan an unau tana thil tam tak an kalsan thu leh chu chuan a nunah nghawng lian tak neiin vawiina a dinhmun pawh hi a thlentir tih a sawi a, nitina a hun tawnah pawh chu chuan nghawng a nei tih a sawi bawk.

People magazine-in an kawm­naah hian Michael B. Jordan chuan a hobby chungchang pawh sawiin, car khalhna atan te, eirawng bawlna leh video game kheltein a hunawl a hmang ṭhin tih a sawi bawk.

Michael B. Jordan hi February 9, 1987 khan Santa Ana, California, U.S-ah piangin kum 1999 aṭang khan lemchan a luhchilh ṭan a ni. A hmingpum chu Michael Bakari Jordan a ni a, lemchan a thiam piah lamah hian producer a ni bawk a,  Fruitvale Station leh Creed a chan aṭang khan hriat a hlawh zual hle a; kum 2018-a superhero movie Black Panther-a villain  Erik Killmonger lem thiam taka a chan hnu phei kha chuan khawvelin tunge a nih a hre chiang tawh hle.

Jordan hi naupang te a nih lai aṭangin naupang model-ah company leh brand ṭhenkhatin an hmang tawh a, chung zingah chuan  Modell's sporting goods leh Toys "R" Us-te pawh an tel a, mahse kum 1999 khan television series Cosby leh The Sopranos-a a inlan hnuah lemchan lam hi a tih tak zetin a luhchilh ta a ni.

Nupui a la nei lo a, anime fan ni bawkin Mizo ṭhalai tam tak ang bawkin Naruto: Shippuden leh Dragon Ball fan a ni ve nghe nghe. 

Film 15 velah inlan tawhin TV show 20 dawnah a inlan tawh bawk a, music video-ahte pawh a inlan tawh bawk a ni.