Billboard 200: Ariana Grande 'Positions' bawk a la tla na

Billboard 200 chart-ah Ariana Grande album thar ber 'Positions' pawh pakhatna  ani leh a, Pop Smoke 'Shoot for the Stars Aim for the Moon' chu pahnihna niin 'F*ck Love' The Kid Laroi chu pathumna a ni.

Ariana Grande studio album parukna 'Positions' chu US Billboard 200 chart-ah a kar hnihna atan No.1 a ni leh a,  Republic Records kaltlanga a tlangzarh a album hian kar hmasa khan equivalent album unit 82,000 a la hmu chhuak niin Nielsen Music/MRC Data chuan a tarlang.

A album unit hmuh chhuah aṭanga 73,000 hi chu streaming equivalent album (SEA) unit a ni a, 8,000 chu album sales niin a dang zawng chu track equivalent album (TEA) unit a ni thung. 

Doja Cat, the Weeknd leh Ty Dolla Sign-te a thawhpuina 'Positions' album hian US bakah  Canada, Ireland, New Zealand, Norway, leh United Kingdom-ahte pawh chart-ah No.1 a lo ni tawh a, album review-tu ṭhenkhat chuan Grande aw an fak viau laiin a production leh a hla thute an sawisel a ni.

Chart topper pawh lo ni tawh Pop Smoke 'Shoot for the Stars, Aim for the Moon' chu pathumna aṭangin pahnihnaah a rawn inhlangkai leh a, EAU 57,000 a hmu chhuak.

The Kid Laroi 'F*ck Love' chu pa­thumna a ni a, No. 81 aṭangin pathum­naah a rawn invawrh dawrh a, EAU 52,000 a hmu chhuak a ni.

Top 10-ah album tlangzarh thar pakhat awmin NAV 'Emergency Tsunami' chu parukna  a ni.

Taylor Swift album 'Folklore' pawh Top 10-ah rawn inhlangkai lehin 27-na aṭangin 10-naah a rawn invawrh ve leh bawk.

Ariana Grande hian Thawhlehni khan a album-a mi, a hmaa official audio single-a a lo tihchhuah tawh '34+35' chu music video a tichhuak.

Kum 27 mi singer hi a music video tharah hian scientist lemah a chang a, amah ang robot siam a tum a ni. He music video hi YouTube leh streaming platform dangah pawh a awm tawh a ni.