HNAM hnatlang ; Zaithiamte an thawk chhuak ṭha

Nimin khan NGO Coordination Committee (Joint NGO) te hmalaknain Hnam Hnatlang buatsaih a ni a, he hunah hian zaithiamte pawh an thawk chhuak ṭha hle. He hunah hian Vanlalsailova, Zoramchhani, Zualboihi leh H. Vanlalhlana te an zai a, inpumkhatna lam hla ṭha tak tak an sa a ni.

YMA, MUP, MHIP, MZP leh MSU-te telna Joint NGO buatsaih Hnam Hnatlang hi Raj Bhavan hmar lam gate bulaah neih a ni a, veng hrang hrang aṭanga thawk chhuak an ṭhahnem hle. Thusawi kar lalakah zaithiam te zai ngaithlak a ni a, mipuiin an hlut hle.

Vanlalsailova'n a hla thul khung 'Zoram ṭang fan fan' tih hla a sak laiin mipuiin chunglamah ban pharin an lo zawm dual dual a, boruak a nung ṭha vet vet hle. A zai hma leh zai karlakah hian mipui an au rual dual dual bawk a, Mizo mipui kan inpumkhat zia alang chiang hle a ni. Zoramchhani pawh a zai ṭha hle a, mipui thawm pawh a ring ṭha hle.

Zualboihi a lÂwm
Zualboih chuan, "Mizo mipuite inlung­rual zia a lang a, a lawmawm tak zet a ni. Inlungrual taka kan awm chuan kan hmaah engpawh lo thleng se hlauhthlawnna tur a awm lo a, huaisen takin kan hmachhawn zel dawn a ni," tiin a sawi.

Zualboihi hian 'Teuh lo mai' tih leh 'Aw Zoram nuam' te a sa a, mipui lam aṭangin thlawpna a hmu ṭha hle a ni. "Mizote kan inpumkhat zia lantirnaah ka zai thei hi ka lawm a, rilru pawh a khawih hle a ni. Zai turin min sawm lo pawh nise phur takin ka thawk chhuak tho ang," tiin, Hnam Hnatlang a ngaihpawimawh zia a sawi.

Chaltlang nula Zualboihi chuan Mizote kan inlungrual zia hmuh theiha a awm chu lawmawm a tih thu sawiin, theih tawp chhuaha ṭanho zel chu thil pawimawih ber a nih thu a sawi chhuak bawk.

Vanlalhlana a inpumpek!
Mizo mipa zaithiam chuai thei lo H. Vanlalhlana chu Hnam Hnatlang ngaipawimawh ber te zingah a ṭang a, chaw pawh ei hman loin a thawk chhuak. "Mizote kan inpumkhat zia a lang a, a lawmawm tak zet a ni. Keipawh phur takin ka thawk chhuak ve rawih a, kha ti zat ram leh hnam hmangaih avanga thawkchhuak ka hmu khan min tihlim tak zet a ni," a ti.

Vanlalhlana hian Lalruatpuii hla phuah 'Zoram hmangaihtu' tih hla chu mipui pungkhawm hmaah hian a sa a ni.

Hnam Hnatlang-ah hian Feli Fanai, Rosy K Remsangpuii, Fiona Pachuau, Henry Varte leh zaithiam dang eng emaw zat pawh an thawk chhuak bawk. Feli Fanai chuan, "Ṭhalai zawkte hi ram leh hnam tana ke kan pen a ngai tak zet a, keipawhin ram chhan nan chuan theih tawp chhuah ka duh a ni. Mizoram hi kan ram neih chhun a ni a, he ram leh hnam hi humhalh tur chuan kan ṭanrual tlat hi a ngai a ni," a ti.

"Mizo mipuite kan lungrual zia ka hmuh khan Mizo nih nawmzia leh kan vanneih zia ka hre thar lehzual a, mahni theihna zawn ṭheuhah theihtawp chhuahin i ṭang zel ang u," tiin a sawi bawk.