Artist-te'n Russia show an ṭhulh zel

Russia-in Ukraine a rûn duh loh lantirna kal zelah artist eng emaw zatin Russia-a show an neih tur an ṭhulh tawh a, Green Day chu ṭhulh hmasa ber zinga mi niin May 29- Moscow Spartak Stadium-a an show neih tur an ṭhulh thu an sawi hnuah Louis Tomlinson pawhin Russia rama show a neih tur a ṭhulh thu a sawi ve leh ta.

Louis Tomlinson chuan July 6-a Moscow-a show a neih tur chu tiam chin awm loin a ṭhulh tih Twitter kaltlangin a sawi. July 6-a Mosow-a show a neih hma hian July 4-ah Kyiv-a Stereo Plaza-ah show nei turin ruahmanna a siam bawk a, chupawh chu a ṭhulh a ngai dawn bawk.

Russia-a show neih tur ṭhulh hi an awm nual tawh a, Yungblud pawh chung zingah chuan telin, The Killers, Iggy Pop, Franz Ferdinand, Bring Me the Horizon leh Nick Cave & the Bad Seeds-te pawhin Green Day hnungzuiin Russia show an ṭhulh thu an sawi tawh a ni.

Nikum Eurovision song contest winnner Maneskin pawhin European tour an neih tur chu Russia leh Ukraine ram buaina vangin an sawn hla tih an sawi ve bawk.