BTS-in Social Media Guinness World Record thar pathum siam

Record siam tawpsan thei lo Bangtan Boys chuan Social Media Guinness World Record thar pathum an siam leh ta.

Guinness World Records official website chuan hemi chungchang hi tarlangin 'Butter' hitmaker BTS chuan thla hmasa chhung khan record thar pathum an siam tih hi an puangzar a, ARMY tan chuan thu hriat nuam tak a ni ngei ang.

Instagram, Twitter leh TikTok-a music group follower ngah ber an ni.

BTS hian thla hmasa chhung khan Instagram lamah follower 60,151,959 an nei tling hman a, Instagram lama music group follower ngah ber record an siam. BTS hian anmahni record vek an khum niin Billboard chuan a tarlang a, nikum April thlaah khan follower 40,220,226 neiin music group follower ngah ber record an siam tawh a, chu chu chelh chhunzawm zelin tunah phei chuan follower mtd 60.5 chuang an nei tling tawh hial!

Bangtan Boys record hi chutah chuan a la tawp mai lo, TikTok leh Twitter lamah pawh music group follower ngah ber record thla hmasa chhung khan an siam bawk. TikTok lamah follower mtd 45.7 chuang an nei tawh a, Twitter lamah pawh follower mtd 44 chuang zet an nei a ni. Twitter lama music group follower ngah ber record chelh ṭhintu chu One Direction an ni a, kum 2017 khan follower mtd 31 chuang neiin Guinness World Record-ah ziah luh an lo ni tawh a, mahse chu record chu BTS hian an rawn khum ta a ni.

BTS hian Guinness World Records 25 chuang an siam tawh a, Billboard chart lamah pawh record duhawm tak tak an lo siam tawh nghe nghe.

A group ang mai pawh ni loin mimal ang pawhin BTS hian social media lamah huhang an ngah a, record pawh an lo siam tawh a ni. Nikum December thlaah khan V chu IG-a follower maktaduai nei tling rang ber a lo ni tawh a, minute 43 chhungin a nei tling hman! Chumai a la ni lo, darkar 4 leh minute 52 chhung lekin follower mtd 10 a nei hman a, hei pawh hi IG-ah chuan record a ni tho bawk.