John Mayer-in kum 21 hnuah Columbia Records a chhuahsan dawn ta

American singer leh guitarist John Mayer chuan Zirtawpni liam ta khan Instagram lamah thuchhuah siamin kum 21 tehmeuh a lo thawhpui tawh Columbia Records nena an thawhdunna chu a titawp tawh dawn tih a puangzar.

"Kum 21 hnuah, studio album pariat ka tihchhuah tawh mai bakah mi fel tak tak leh inkungkaihna ṭha tak ka neih hnuah, Columbia Records nena recording agreement kan neih chu tithar tawh lo turin thutlukna ka siam ta. Inthlah har dawn hle mah se, rimawi thar siamna kawnga hmun dang pan erawh ka phur tawh a, keima tan leh artist dang tan pawh. Tunhma zawng aiin rimawi ka ngainatna a zual a, ka hna ṭha ber ber chu ka hmalamah a la awm niin ka ring bawk," tiin John Mayer chuan a sawi.

'Slow dancing in a burning room' hitmaker hian Aware Records kaltlangin Columbia hi a zawm a, studio album pariat lai an tichhuak ho hman a ni. Chung zingah chuan vawi nga lai platinum-a puan tawh kum 2001-a tlangzarh 'Room for Squares' te, kum 2003-a tlangzarh vawi thum platinum-a puan tawh 'Heavier Things' te, kum 2006-a tlangzarh, Mizo tam berin kan hmelhriatna a album hit tak leh guitarist ṭha a nihzia a pholanna album, vawi li lai platinum-a puan tawh 'Continuum' te pawh kha a tel a, kum 2009-a a tlangzarh 'Battle Studies' pawh kha Columbia Records hnuaia a tlangzarh niin vawi hnih platinum-a puan a ni tawh bawk.

Nikum lawka a tlangzarh, Billboard 200 chart No.2 leh Billboard Top Albums Sales chart topper album 'Sob Rock' kha Columbia Records hnuaia a album tlangzarh hnuhnung ber a ni dawn ta niin a lang.

Mayer hian Columbia hnuaia a hla record-te hmangin Grammy award pasarih lai a dawng tawh a, tunah hian 'Sob Rock' tihlarna atan tour nei mekin, Covid-19 a positive avangin chu a tour neih lai chu a chawl lailawk mek a ni.