India Box Office ; AR Murugadoss kutchhuak 'Sarkar' a chungnung Record a siam theih beisei

India Box Office-ah hmel thar a inlar a, chu chu AR Murugadoss kutchhuak 'Sarkar' a ni. He film hian cheng vaibelchhe 100 chuang zet a lalut tawh a, record a siam theih beiseina a sang hle.

Sarkar hi Indian film director zinga hriat hlawh ber te zinga mi AR Murugadoss kutchhuak a nih miau avangin dah hniam chi rual a ni lo va, heti zat sum a la lut pawh hi thil mak a ni lo. Vijay channa Sarkar hi tunkar Nilaini khan tlangzarh a ni a, hemi ni la la hian vaibelchhe 30 zet a lalut a ni.

Hei pawh hi Tamil Nadu bik chauh a la ni zui a, khawvel hmun danga a lakluh te chhiar tel a la ni lo zawk. Hmun 3,000 chuangah chhuah a ni tawh a, hetaṭanga a sum lakluh zawng zawng hi vaibelchhe 100 a chuang tawh a ni.

Vijay, Keerthy Suresh, Varalaxmi Sarathkumar, Yogi Babu leh Radha Ravi te channa film hian sum lakluh tam lamah record a siam theih beisei a ni a, chutih rual chuan a leak-out nia sawi a awm avangin a hmabak a ko hle thei bawk.

A theuneu lo
Sarkar hian Baahubali 2 chu tlangzarh nia sum lakluh tam lamah a khum a, hei ngawt pawh hi thil ropui tak a ni. Baahubali film lar zia sawi nawn a ngai lo a, Bollywood nghawrnghing thei khawpa 'hit' a ni. Sum pawh a huilut hnem rem rem hle a, record pawh eng emaw zat a siam a ni.

Hei hi Sarkar hian a rawn khum zel thei ang em tih chu hriat chakawm tawh tak a ni a, release nia sum lakluh tam lamah chuan a khum nghal phawt a ni.