Spice Girls thâwm a ring tual tual
Tun lai khawthlang media te tuipui ber pakhat chu Spice Girls 'reunion' chungchang a ni a, an ziak kur nasa thei hle. English pop girl group hian reunion tour an neih tur thu tun hnai khan an puang a, an chanchin hian ngaihven a hlawh hle a ni.
Kum 1994-a indin Spice Girls hian tour an neih tur thu hi Thawhṭanni khan an puang chiang ta a, fan tam tak chu lawm avangin an zuang ngei ang. An lar vanglai hre pah chin te tan ngat phei chuan chanchin lawmawm tak a ni ngei ang le.
Nakkum June thla aṭangin tour hi an ṭan dawn a, Mancheter khawpuiah kick-off a ni ang. Hemi hnu hian Coventry, Sunderland, Edinburgh leh Bristol-ahte show an nei zui ang a, June 15-ah Wembley Stadium-ah a hmawr an bawk dawn a ni.
Spice Girls te hian an tour neih tur hi an vaw hot thiam hle a, Nilaini khan Heart FM Breakfast show-ah pawh reunion tour chungchang hi an sawi nasa hle a ni.
Spice Girls hian reunion tour an neih tur thu hi an lo puang tawh a, UK bakah hian North America lam pawh an la pan leh dawn nia tarlan a ni. Tour nei tur hian Mel B, Geri Halliwell, Emma Bunton leh Melanie C te chuan contract an ziak tawh a, Victoria Beckham erawh hmuh tur a awm dawn lo niin an tarlang.