'Thingtlang Tlangval' a hit ; Hmun hrang hrang chhuah chho mek zel

Tun hnaia Mizo film chhuak thar 'Thingtlang Tlangval' chuan en a hlawh hle a, a entawh te zingah pawh en nawn leh ngat an la awm cheu avangin he film hi a 'hit' tih loh phal chi rual a ni lo.

Malsawma (M_Space) leh Mapuia Chawngthu (Leitlang Pictures) te kutchhuak 'Thingtlang Tlangval' film hi October 25 khan Lunglei-ah release a ni a, Aizawl-ah pawh October 27 aṭang khan veng hrang hrangah chhuah ṭan a ni. Tlangzarh a nih hnuah hian hmun 40 chuangah chhuah a ni tawh a, zan khatah veng pathum velah chhuah ṭhin a ni. Tun­ah hian booking 100 chuang a awm tawh a, Mizoram pawn aṭang pawhin ngaihventu an awm cheu bawk.

Hmasawnna duhawm

Mizo ten film industry-ah hma kan sawn tih hmuh theihin a awm chho mek zel a, chumi entirtu ṭha tak pakhat chu 'Thiangtlang Tlangval' hi a ni. He film hi a hmuhnawm satliah a ni lo va, zirtir ṭha tak a nei. Chu chu hmasawnna ropui tak a tih theih a, a script ziaktute pawhin fak an phu hle.

'Mizo film ka en ngai lo' ti tam takin en loh an hlau tawh a, chu chuan hmasawnna hmuh theiha a awm zia a tarlang chiang hle. Ram dang te angin theatre leh cinema hall changtlung tak tak nei lo mah ila mahni veng ṭheuhah kan en thei a, sum tuakna ṭha tak a la ni cheu bawk.

Veng hrang hrangah pawl leh mimalin sum tuak nan an hmang nasa a, film siamtute tan pawh sum sen a ngam awm ta! Zanin hian Zotlang, Kanan leh Durtlang-ahte 'Thingtlang Tlangval' film hi chhuah a ni ang. Veng hrang hranga chhuah tawhna-ah hall khatin an pungkhawm thei zel a, MIzo film indsutry tan hmasawnna duhawm tak tih loh phal rual a ni lo.

Eizawnna tling?

Hollywood leh Bollywood star te sum lakluh turu zia kan hria a, Mizoramah erawh chaw bel atana ring chawt sawi tur an la awm lo mai thei. Tun anga hma kan sawn zel erawh chuan nakin lawkah chuan zaithiam te ang bawkin - film star ten sum an la hailut thur thur ang a, ṭhangthar zingah film star nih chak an la pung chho zel dawn.

Tunah pawh film changtuten hriat an hlawh chho sawt viau a, sum thawhchhuah nan tak taka hmang pawh an awm nuk tawh ngei ang. Film siamtute pawhin hlawkna an tel chho ve mek zel a, a changtu tur thlan kawngah pawh an duhtui sawt hle tih a lang bawk.

'Thingtlang Tlangval' film-a changtute pawh hi zaithiam lar tak tak - Israel Lalbiakrema, Bethsy Lalrinsangi leh Hlimhlimi te an ni nawk a, midang pawh hi sulhnu nei ṭha tak tak te an ni hlawm.