FAKTU hla thar 'Ka Felna Krista'

Mizo Gospel singer ṭha tak tak- RK Vanlalpeksanga, JH Lallungmuana, Lalbiakkima, Lalremsanga, leh Zosangzuala Chhangte-te band FAKTU chuan hla thar 'Ka Felna Krista' an tichhuak dawn.

'Ka Felna Krista' hi Lalrindiki w/o C. Lalpartlana (Delta Sound) phuah niin Pathianin mi sualte min tlanna ropui zia tarlanna hla ṭha tak a ni a, Pathian pawlna dawnga hla ṭha tak a phuah hi Faktu-te hian a thluk an lo siam thung a, ngaihthlak a manhla hle ang.

Music track pawh a mawi dawn tih a chiang. Mizo guitarist ṭha ber zinga mi Ephraim-a kut chhuak a ni a, Bruce Pachuau bass guitar perh ri mawi tak hriat tur a awm dawn bakah keyboard nalh tak, Faktu member JH Lallungmuana kuthnu ngaihthlak tur a awm dawn bawk a ni. Recording chu Biaka, King & Prophets kut chhuak a ni thung a, music video hmuh nuam tak, Bs Picture kut chhuak hmuh turin a awm dawn bawk.

Video hmuh a nuam dawn a, stage changkang takah Delta Sound & Light-te'n sound & light ṭha tak an chhawp chhuah hnuaiah Faktu-te hi an chevel dawn a, mit leh beng a tlai hle ang.

"He an hla hian thlarau a hnungtawlh leh chaute tan chakna leh an tan malsawmna, tisa leh thlarauah lo thlen ngei se tih chu kan ṭawngṭaina a ni e," tiin Faktu-te chuan an sawi a ni.