Adriana Lima hun a liam ta ; A vawi thum nan Gigi leh Bella inlan dun

Khawvela fashion show ropui ber zinga mi, Victoria Secret Fashion Show chu Ningani khan New York-ah neih a ni a, Adriana Lima tan he show-a a inlan tawpna a ni ta. Brazilian model Lima hian kum 20 dawn a lo chenchilh tawh hi mittui nen a thlah liam a, mipui hmaah a insum zo lo.

Hetih lai hian Gigi Hadid leh Bella Hadid te chu a vawi thum nan Victoria Secret Fashion Show-ah an inlan dun a, lawm an hlawh hle.

Mangṭha Lima!
Victoria Secret Fashion Show a nih tawh chuan mi tam tak mithlla-ah Brazilian model Adriana Lima hmel a lang ṭhin.

Kuminah pawh Adriana Lima hian lawm a hlawh leh pek hle a, Victoria Secret model ni chunga a inlanna hnuhnung berah hian mipuiin zahna an lantir hial. Lima hi a thuam mawi tak nen a pen chhuak a, a hmuna entu mipui thawm a ring ṭha kher mai.

Victoria Secret Fashion Show-a a inlan ṭum 19-na leh tawpna ni bawkah hian mittui nen dawhsan a chhuahsan a, mipuiin zahna lantirin standing ovation an pe bawk.

Sulhnu ropui chu...
Kum 37 mi Adriana Lima hi kum 1999 khan a vawi khat nan Victoria Secret Fashion Show-ah a inlan a, hetih lai hian kum 18 mi chauh a ni. Hun rei lo te chhungin Victoria Secret Angel zinga hriat hlawh ber pakhat a ni chho a, kum 2018-ah meuh chuan he show inlan hnem ber a ni ta hial a ni.

Kum 20 chhung zet Victoria Secret Angel a nih chhung hian show 19-ah a inlan a, 2009 khan a rai avangin a inlan lo. Hei chauh hi a inlan loh awm chhun niin, kumin hi Victoria Secret Fashion Show-a a inlan ṭum 19-na leh a tawpna chu a ni ta a ni.

Gigi & Bella Hadid
American fashion model Gigi Hadid leh Bella Hadid te chu a ṭum thum nan Victoria Secret Fashion Show-ah an inlan dun a, mipui mit fukna ber zinga mi an ni. Kum 23 mi Gigi leh Bella (22) te hian an thuam inbel an inhmeh leh pek hle a, model rual zingah pawh an langsar hle a ni.

Kendall Jenner, Lima, Elsa Hosk, Candice Swanepoel, Jasmine Tookes leh Behati Prinsloo te chuan ramp an zawh bawk a, anni bakah hian Victoria Secret Angel chhe lo tak takte an inlan bawk.

Victoria Secret Fashion Show-ah hian Candian singer Shawn Mendes a perform a, Halsey, Rita Ora, The Struts, Kelsea Ballerini leh Chainsmokers te an inlan ve bawk.

Victoria Secret Fashion Show hi 2016 khan France khawpui Paris-ah nghah a ni a, nikum khan China chuan thlengin Shang­hai khawpuiah show hi neih a ni. Kumina erawh New York khawpuiah nghah a ni ve leh ta a, mipui pawhin an hlut hle a ni.