Rehab aṭangin Selena Gomez a chhuak

Rilru lamah harsatna a neih avanga thla khat vel zet enkawlna ṭha bik pek a nih hnuah Selena Gomez chuan rehab a chhuahsan ta.

American singer Selena Gomez hian rilru lamah harsatna a neih avangin October thla khan rehab-ah a lut a, a thawm pawh a reh zui viau. Enkawlna ṭha bik a dawn hnuah ṭhat lam panin a chhuak leh ta a ni.

A thu puangtu chuan, "Selena hi dam takin a chhuak a, a hma ai khan a ṭha tawh zawk a ni. Mahse enkawlna ṭha tak a la mamawh zui dawn a ni," tiin a sawi.

Kum 26 mi Selena Gomez hi a kal thlaksak a lo ni tawh bawk a, rilru lamah harsatna a tawh avangin a bik taka enkawl a mamawh zui bawk. Rehab-a dahluh anih hma hian hospital-ah pawh enkawl a ni a, a rilru leh taksa a chaurau rih hle a ni.