Electric Vengthlang Branch KṬP an thiam ber
September 14 ṭanga ṭan Praise On 2018 chu kar kal ta Zirtawpni zan khan zawh fel a ni ta a, KṬP Branch hrang hrang aṭanga band 55 inel zingah Electric Vengthlang Branch te an thiam ber.
Chanmari West Hmar Veng KṬP Branch chu pahnihna an ni a, pathumna chu Ramhlun North Branch te an ni.
Zirtawpni zan khan Mission Veng Kohhran Hall-ah result puanna leh a kharna hun hi hman a ni a, lawmman sem nghal a ni bawk.
He Beat Group intihsiak hi round thumah ṭhen niin, final round bik hi zan hnih neih a ni. Final round-ah hian band 10 an inlan a, a tawpah result hi khaikhawm niin - Electric Vengthlang Branch te an ding chang ta a ni.
Final zan hian Mizoram Synod Choir, Praise On 2017 Winner - Dam Veng Branch Praise Team, CKṬP-Synfo Fakzai Band leh David Vanlalpeka te an zai. A tawpah Praise On 2018 Winner - KṬP Electric Vengthlang Branch te an zai bawk a ni.
Mimal lawmman
Mimal lawmman hrang hrang siam niin, Best Vocalist atan Vanmalsawmkima, Dawrpui Branch chu thlan a ni. Best Guitarist chu Lalruatdika, Ramhlun North Branch- White niin, Best Bassist chu Chaltlang Branch bassist Albert Lalduhsaka kutah hlan a ni.
Best Keyboardist atan Rinsangzuala, Republic Veng Branch chu thlan niin, B Malsawmdawngliana, Chanmari West Hmarveng Branch chu Best Drummer atan thlan a ni bawk. Hetih lai hian pakhatna Electric Vengthlang Branch ten mimal lawmman an la ve lo thung.
Synfo leh CKṬP buatsaih Praise On 2018-ah hian band 61-in hming an pe lut a, chung zinga band 55 te chuan intihsiak hi an hmachhawn a ni.
Upa Zothanmawia, T. Upa Richard VL Zara leh T. Upa Elijah Lalrinawma ten endik hna an thawk a, K. Lalrampani chuan intihsiakna hi a host a ni.
Praise On 2018 Top 3
1. Electric Vengthlang Branch
2. Chanmari West Hmar Veng Branch
3. Ramhlun North Branch
Mimal Lawmman
Best Vocalist - Vanmalsawmkima, Dawrpui Branch
Best Guitarist - Lalruatdika, Ramhlun North Branch - White
Best Bassist - Albert Lalduhsaka, Chaltlang Branch
Best Keyboardist - Rinsangzuala, Republic Veng Branch
Best Drummer - B. Malsawmdawngliana, Chanmari West Hmarveng Branch