Ranveer leh Deepika ten innei turin Italy an pan

Naktip nakthai maia innei tawh tur Ranveer Singh leh Deepika Padukone te chuan Inrinni khan Mumbai an chuan san a, an inkutsuihna hmun tur Italy an pan a ni.

Bollywood star - Ranveer leh Deepika te hi November 14 & 15 hian an innei dawn a, a hmun tur hi Lake Como, Italy niin media te chuan an tarlang. Italy-ah hian sawm bik te chauh an tel dawn a, India-ah a lawmna hran buatsaih leh a ni ang. Hemi tur hian Inrinni zingkar khan Mumbai Airport aṭangin Italy hi an pan ta a ni.

An inneih ceremony hian ni li chhung a awh dawn a, November 13 aṭangin function ṭan a ni ang. November 14-ah Kannadiga Style-in an inkutsuih ang a, a tukah North Indian Style (Anand Karaj)-in an tileh dawn bawk.

Ranveer Singh hi Sindhi-Punjabi origin a ni a, hetih lai hian Deepika erawh South Indian a ni. Hei vang hian an innei pawh hi a rei phah dawn a, an hnam dan ve vein an inkutsuih dawn a ni. Hei bakah hian Dcember 1 khian Grand Hyatt, Mumbai-ah a lawmna hran an la buatsaih leh dawn bawk.

Hei mai hi a la ni lo a, an inkutsuih hma hian Mumbai leh Bengaluru-ahte a lawmna hi an lo buatsaih lawk tawh bawk a ni. Kum 33 mi Ranveer Singh leh Deepika Padukone (32) te innei tur hian thawm a nei lian hle a, Bollywood titipui ber pakhat a ni mek.