K. Hminga music video thar 'Tu Nge Inthlei Thei?'

A hmelhmuh tur a awm loh avanga 'Tunge K. Hminga?' an tih luai luai ṭhin chuan, mihringte zinga intluktlan lohna avanga inthleina duh lohna au chhuahpuina hla, 'Tu nge inthlei thei?' tih chu zanin hian a tichhuak dawn ta.

Zoram rimawi khawvela hriat hlawh chho mek leh beiseiawm berte zinga mi, K. Hminga music video thar hi zan dar 9:00-ah ama YouTube channel-ah upload a ni dawn a, chan a sual lo ang.

Tunge K. Hminga chu?

Zaithiam leh hla phuah thiam ni bawk K. Hminga hi mi ṭhenkhat chuan kan la hmelhriat lutuk lo mai thei a, a hla erawh kan hre lar fuin a rinawm. 'Di Hlui' (Hmangaih Hmasa ber), Siar Lalnu leh Aw Lungrun tih hlate hmanga Zoram mipui min awi tlei mektu a ni a, a sulhnu enin dah hniam chi rual a ni lo.

K. Hminga hian Zofate rilrem zawng tak hlathu mawi leh ril tak tak a chhawpchhuak ṭhin a, hriat pawh a hlawh chho sawt hle. A kalphung daidai leh ngainatawm tak avanga hming chher chho mek a ni a, tun ṭuma a music video pawh hi a 'hit' hla tura ngaih a ni.

'Tu Nge Inthlei Thei?' tih hla hi K. Hminga hla lo zaipui tawh a, lo ṭahpui hial tawh tan chuan hmaih phal chi rual a ni lo.