Sum tam tak nen 'The Batman' a rawn thlawk lut

Robert Pattinson channa, mi tam takin an nghahhleh 'The Batman' chu tlangzarh a ni ta a, Box Office-ah rawn che ṭha nghalin kumin chhunga film tlangzarh zinga sum lalut tam ber pawl a ni nghal.

Film review-tute fak rawn 'The Batman'
'The Batman' hi North America-ah chuan theatre 4,417-ah chhuah a ni a, $134,008,624 lai lalut nghalin kumin chhunga tlangzarh kara North America Box Office aṭanga sum lalut tam ber a ni.

Film review-tute mit a tlung a, performance, cinematography, direction, editing, visual style, action sequence leh a story pawh an fak em em vek a ni ber mai, ṭhenkhat erawh chuan a film a rei lutuk mah mah niin an sawisel ve bawk. Rotten Tomatoes lamah chuan mi 387 laiin review-in rating 7.6/10 lai a hmu phak. A hmuhnawm tih a chiang e.

Robert Pattinson, Zoë Kravitz, Paul Dano, Jeffrey Wright, John Turturro, Peter Sarsgaard, Andy Serkis, leh Colin Farrell-te channa film hi kumin chhunga film sum lalut tam palina a ni nghal a, sum lalut tam ber dinhmuna ding tur pawhin a hmabak a eng hle. $mtd 185–200 vel senga an siam film hian tlangzarh karah an budget khum nghalin khawvel pumah $mtd 258.2 lai sum a lalut tawh a, US pawn lamah $124,200,000 lai a lalut a ni.

He film hi hmeichhe lam aiin mipa lamin an lawm zawk deuh niin a lang, US-ah chuan 'The Batman' en tura kal zinga 65% chuang lai chu mipa an ni a, 60% chuang chu kum 18-34 inkar ni bawkin naupang lam aiin ṭhalaiin an bengkhawn mah zawk tih a lang chiang bawk.

Film thar che ṭha dang a vang
Tom Holland channa 'Uncharted' chu pahnihna a ni a, theatre 3,875-ah chhuahin $11,102,182 a lalut. 'The Batman' nen an sum lakluh a inthlau hle.

Pathumna chu 'Dog' kha niin theatre 3500 chuangah chhuah mah se $6,116,815 chauh a lalut tawh a ni. 'Spider-Man: No Way Home' chu palina a ni a, "Death on the Nile' chu pangana a ni ve bawk. Film thar 'Gangubai Kathiawadi' chu pakuana a ni thung.

Film thar dang
Box Office Mojo chart-ah film 44 tarlan a ni a, chung zingah chuan After Yang (24), Great Freedom (31), Huda's Salon (33) leh Adventures in Success (37)-te chu film thar an ni.

Box office top 10:-
1 The Batman $134,008,624
2 Uncharted $11,102,182
3 Dog $6,116,815
4 Spider-Man: No Way Home $4,519,623
5 Death on the Nile $2,752,197
6 Sing 2 $1,635,325
7 Jackass Forever $1,424,472
8 Cyrano $678,783
9 Gangubai Kathiawadi $592,000
10 Scream $575,787