TikTok leh Netflix-in Russia ramah an service khuahkhirh

Video-sharing site TikTok chuan Russia ramah live streaming a titawp lailawk rih tih tarlangin, content thar pawh dah an phalsak rih lo tih an sawi a, Netflix pawhin Russia-in Ukraine a rûn duh lohna lantirna atan Russia ram aṭangin a inhnukdawk tih an sawi ve bawk.

US credit card company hrang hrang- Visa, Mastercard, leh American Express-te pawhin kar tawp liam ta chhung khan Russia rama an service an tihtawp dawn thu an puang ve bawk a, South Korea company lian Samsung pawhin technology company lian dang Apple, Microsoft, Intel, leh Dell hnungzuiin Russia ramah an thilsiam an thawn lut rih dawn lo tih an puang ve bawk a ni.

Russia ramah hian TikTok hmangtu maktaduai 36 vel an awm a, "Russia 'fake news' law thar chungchang ngaihtuah chungin, loh theih lohin live-streaming titawp rih tur leh kan video service-a thil thar dah rih lo turin thutlukna kan siam a ngai ta a ni," tiin Twitter kaltlangin TikTok chuan thutlukna an siam. In-app messaging service-ah erawh nghawng a nei dawn lo tih an sawi tel.

Netflix thupuangtu pawhin Pathianni khan thuchhuah siamin thil awmdan thlir chung zelin Russia rama an service chu titawp rih turin thutlukna an siam tih a sawi. Russia ramah hian kum 2016 aṭang khan Netflix hian service an ṭan a, subscriber erawh ram dang ngaihtuah chuan an ngah lo hle a, maktaduai 1 vel chiah an nei a ni.