'Levitating' vangin Dua Lipa an khing leh tawh!

British singer Dua Lipa lakah 'Levitating' vang bawkin copyright lawsuit thehluh a ni leh tawh a, tun ṭumah erawh hi chuan hla hlui deuh hlek entawnah puh a ni thung.

Zirtawpni liam ta khan Manhattan federal court-ah Dua Lipa hekna hi thehluh a ni a, songwriter L. Russell Brown leh Sandy Linzer-te chuan Lipa chu kum 1979-a an tihchhuah hla 'Wiggle and Giggle All Night' leh 1980-a tihchhuah 'Don Diablo'-te copy-ah an puh. 'Levitating' inṭanna chu an hla thluk entawna siam a ni tih an sawi.

Dua Lipa hi tunhnai lawk khan Florida reggae band Artikal Sound System chuan 'Levitating'-ah hian kum 2017-a an tihchhuah track 'Live Your Life' copy-ah an lo puh tawh bawk a ni.

'Future Nostalgia'-a hla hit ber 'Levitating' hi Billboard chuan kum 2021 chhunga hla hit berah a lo puang tawh a, Billboard Hot 100 chart-ah pawh kar 68 chhung zet a cham a ni.