Marvel Comics real-life superhero Stan Lee a thi

Marvel Universe-a superhero tam tak siamtu Stan Lee chu Thawhṭanni khan Cedars Sinai Medical Center, Los Angeles-ah kum 95 mi niin a thi.

Stan Lee hian kumin kumtir lam khan Pneumonia a vei thu a lo sawi tawh a, February thla pawh khan a natna avang hian damdawi-inah dah luh a lo ni tawh a ni. He tihlai hian a thih chhan tak erawh puanzar a la ni lo thung.

Marvel Comics zawng zawng deuh thaw a - phek hmaa a hming lang ṭhin Stan Lee hi comics chhiar ṭhinte ziangah hre lo an awm awm lo e. Marvel Universe lamin movie siam lama nasa taka hma a rawn sawn hnu phei chuan Mizo te zingah pawh hriat a hlawh leh zual hle a ni.

Stan Lee hian Marvel comics-ah mai ni lo, DC comics tan pawh a thawh hlawk hle. Entertainment khawvela superhero lar tak tak - Black Panther, Spider-Man, X-Men, Mighty Thor, Iron Man, Fantastic Four, Incredible Hulk, Daredevil leh Ant-Man-te hi Stan Lee a kutchhuak te an ni. Heng superhero tam tak te hi a siamchhuah an nih bakah a siamnaa a puihte an ni hlawm.

Tunlai Marvel movie lar tak tak, record lian tak tak rawn siam ṭhin tute hi Stan Lee chu awm lo se khawvel hian kan hre kher lo mai thei a, hei hian Stan Lee ropuizia a tarlang chiang hle. Marvel movie eng emaw zatah a inlan tawh bawk a, lawm pawh a hlawh ṭhin hle a ni.

Stan Lee hian entertainment khawvela sulhnu ropui tak a hnutchhiah a, chawimawina pawh a dawng hnem hle. Chung zinga langsar zual te chu - Inkpot Award (1974), The Will Eisner Award Hall of Fame (1994), Jack Kirby Hall of Fame (1995), Saturn Award (2002), National Medal of Arts (2008), Scream Awards(2009), Hollywood Walk of Fame (2011), Visual Effects Society Awards (2012), Producers Guild of America(2012), National Academy of Video Game Trade Reviewers(2017) te an ni.

Stan Lee hian ngaisangtu pawh a ngah hle a, County of Los Angeles leh City of Long Beach-te chuan October 2, 2009 kha Stan Lee Day-ah an lo puang hial tawh a ni.

Stan Lee hi December 28, 1922 khan New York-ah piangin a hmingpum chu Stanley Martin Lieber a ni a, December 5, 1947 khan Joan Clayton Boocock nen inneiin; fa pahnih an nei a ni. July 6, 2017 khan a nupui Joan hian a boral san a ni.