Feli Fanai music video thar 'Tuman an tluk lo' release a ni ta!
'Pheichheh mawi i khai ang aw' a ti zet a, chumi hnuah 'Tuman an tluk lo' tih hla nen a rawn inlar leh ta. Feli Fanai chuan kumina a single music video hmasa ber 'Tuman an tluk lo' tih chu Thawhṭanni zan khan a release ta a, Zonet local channel-ah pekchhuah nghal a ni.
Feli Fanai hian 'Pheichheh mawi i khai ang aw' tih hla hmangin Ṭhazual chart-ah vawi eng emaw zat pakhatna a lo hauh tawh a, tuna a music video thar pawh hian No.1 a hauh leh thuai a rinawm. A music video hi a dangdai viau a, mit leh beng a tlai hle a ni.
Tuma tluk loh chu...
'Tuman an tluk lo' tih hla hi nula tlangval inngaihzawnna hla niin, a kawppui chu tuma tluk rual loh a nih zia tarlanna a ni. He hla hi rimawi khawvela hriat hlawh tak Myztic Sailo phuah niin, Feli Fanai hian hnehsawh takin a sa chhuak a ni.
Music track hi Lal K Sailo siam niin, recording pawh a tihsak bawk. Video hi ROAR Media Production kutchhuak a ni a, hmuh a nuam hle. He music video hi tha leh zung tam tak senga siam a ni a, en pawh a manhla hle a ni.
A ti mai mai lo!
Feli Fanai chuan, "Music video siam hi a hautak em em a, rilru leh ngaituahna zawng zawng sen a ngai a ni. Sum leh pai pawh a hautak a, hna berah neih tawp a ngai a ni," tiin, music video atana a inbuatsaih nasat thu a sawi.
"Video hi kan uluk em em a, shooting neihna tur hmun pawh kan thlang uluk hle. Theih tawp kan chhuah a, ngaihdan hrang hrang kan thawh khawm hnuah kan puitlin thei ta a ni. Mizo Dance Camp (MDC) ten min pui bawk a, an zarah music video hmuhnawm tak ka puitlin thei ta a ni," a ti.
Feli Fanai music video-ah hian lam hmuhnawm tak hmuh tur a awm a, MDC member 30 dawn an inlan a ni. Shooting hi Pachhunga University College-ah neih a ni a, hei bakah hian studio lamah pawh eng emaw zat shoot a ni.
Mizo Lengzem singer zinga hriat hlawh ber te zinga mi Feli Fanai hian a music video thar hi Music Domain Mizoram (MDM) library-ah a dahlut tawh a, Zonet local channel bakah, thla khat hnu velah YouTube lamah upload a ni ang.