Wonder Woman 1984 tihchhuah dan tur a chiang ta
An tlangzarh dawn, tlangzarh hun an sawn hla leh, HBO Max-ah an tichhuak dawn tih vel thawm kan hriat kan hriat hnuah Wonder Woman 1984 chu tlangzarh dan tur tihchian a ni ta a, Israel lemchan thiam leh model chhe lo tak Gal Gadot channa hi December 16-ah Europe ram leh khawvel ram ṭhenkhata theatre hrang hranga en theih turin tlangzarh a ni dawn a' USA-ah chuan ruahmanna lo awm tawh sa angin Krismas present atan Krismas niah tak an tlangzarh dawn.
Thu leh hla tam tak, thuchiang deuh te, chiang lo deuhte hriat tur a awm nawk hnuah Warner Bros. chuan Wonder Woman 1984 chungchangah hian thutlukna mumal an siam ta a ni.
HBO Max-ah en theihin a awm dawn
US-a an tlangzarh ni Krismas niah tak hian Wonder Woman 1984 hi HBO Max-a en theih turin an tlangzarh tel dawn a, HBO Max subscriber-te tan chuan chawi belh awm chuang loin thla khat chhung stream theihin an dah dawn a ni.
Flim Industry tana 'great depression' 2020 leh WW 84
Kumin hi hripui leng vangin mi zawng zawng tan kum lungngaihthlak leh kum nuam lo tak chu a ni ngei a, chung zingah chuan Film Industry hi a nghawng nat ber pakhat chu a ni ngei ang.
Wonder Woman 1984 ngei pawh a film siamtute lam chuan theatre-a tihchhuah ngei an duh a, fan-te tana big screen-a han chhuah hluai an chak avangin hripui leng karah pawh theatre-a tihchhuah theih turin chhawp chhuah hram an tum a ni. Chutih rual erawh chuan Box Office-a sum lut a chhe hle a, budget tam taka an siam film a nih bawk avangin film siamtu lam lu a hai hle tih a hriat a, tlangzarh hun pawh an sawn ngun ta malh malh hle.
WarnerMedia Studios lama an hotute pawhin Wonder Woman 1984 chu film ropui tak a nih thu leh big screen-a chhuah ngei chi a nih thu an sawi a, chutih rual chuan hripui leng vangin mi tam takin theatre an pan theih tak loah chuan HBO Max lama pekchhuah tel mai an titlu ta niin an sawi.
WW84 hi kumin chhunga film hralh kal ber tur zinga mi a ni chiang a, hripui leng lo se chu $tluklehdingawn lalut thei tura beisei niin hripui leng kara tlangzarh an tum takah hi chuan sum lakluh tura an beisei ang hi chu an lalut thei dawn lo tih a chiang saa ngaih a ni.