One in Christ Krismas hla thar 'Kutphah te reuh te'

One in Christ chuan Kris­mas hla thar an peih fel leh ta a, 'Kutphah te reuh te' tih a ni.

Member pasarih awmna One in Christ hian nikum khan 'Chibai i buk ang u' tih hla an lo tichhuak tawh a, tuna mi hi Krismas hla bikah chuan a pahnihna a ni.

'Kutphah te reuh te' tih hla hi an band khaipa Alvin Lalruatfela lehlin niin, Mizo rilrem zawng tak a ni. A hla thu a ṭhain ngaihtlak a nuam a, One in Christ hian an sa mawi tak zet a ni.

Music track hi Andrew Vanchhawng siam sak a ni a, recording hi Studio A-16 kutchhuak a ni. Music video mawi tak maia siam saktu hi Bilywaif a ni a, Krismas boruak nen inmil thei ang ber tura siam a ni. Krismas hla ṭha tak a pian belh leh ta hi chanchin lawmawm tak a ni.

One in Christ hi tunlai band/group zingah chuan hriat hlawh ber te zinga mi an ni a, an nung ṭha vet vet hle. Kumin chhung ringawt pawhin music video panga an tichhuak tawh a, Krismas hla thar hi a parukna tur chiah a ni. One in Christ hian Ṭhazual Award 2107-ah khan 'Best Duo/Group' leh 'Best Music Video' an lo la tawh a ni.

An music video thar 'Kutphah te reuh te' hi Music Domain Mizoram (MDM) library-ah dahluh a ni tawh a, zanin hian Zonet-ah tihchhuah a ni ang.