Hla thar nen Mercy a lo kir

Lawngtlai nula zaithiam Mercy Remsangmuani chu hun eng emaw chen a reh vang vang hnuah hla thar nen a lo kir leh ta. Mercy music video thar hi 'Vawng reng nang e' tih a ni a, a official music video pahnihna a ni.

Mercy hla thar hi FVL Hmingmuan­puia phuah niin, music track hi Lal K Sailo siam sak a ni. Recording hi Space Ville Prosesion kut chhuak a ni a, BS Picture chuan video a siam sak thung.

Mercy hian 'Vawng reng nang e' tih hla hi Music Domain Mizoram (MDM) library-ah a lo dah lut tawh a, a aia ṭha leh changtlung zawkin a siam thar leh ta a ni. Music video hi peihfel a ni tawh a, Zonet local channel leh MDM YouTube channel-ahte pekchhuah a ni ang.

Mercy hi 'Hmangaihtu ngaiin an ṭap e' tih hla mawi taka satu kha a ni a, Ṭhazual chart-ah pawh vawi eng emaw zat a lo lang tawh a ni.