Nakkum April thlaah GoT

Game of Thrones ngainatute tan chanchin lawmawm a awm leh ta a, final-season chu nakkum April thla aṭangin tihchhuah a ni dawn. Hemi chungchang hi HBO chuan Thawhlehni khan an puang a, fan te an phur tawh hle.

GoT season riatna leh tawpna ber tur ni bawk hi a chhuah hun tur an inrinsiak nasa hle a, titi pawh a titam hle. Heting boruak karah hian HBO chuan teaser an tichhuak a, tichhuah ṭan hun tur an rawn tichiang ta a ni. April thla aṭangin pekchhuah tur a ni dawn a, a ni tak erawh tarlan a la ni lo thung.

Second 30 vel lek clip an tichhuahah hian mit tivir tawk lekin - Emilia Clarke, Kit Harington, Lena Headey, Sophie Turner leh Peter Dinklage te an lang a ni.

GOT star Maisie Williams chuan final-season tichhuah hun tur hi a lo sawi thawi zauh tawh a, tunah chuan a chiang ta a ni. Episode hmasa ber hi April-ah tihchhuah a ni dawn a, a tahtawlin a chhuak zui dawn a ni. Season riatnaah hian episode ruk a awm dawn nia sawi a ni.