Zorinsanga hla thar zaninah

Mizo Gospel singer mipa zaia sawm hlawh ber zinga mi Zorinsanga chuan zanin hian Zonet lamah music video thar 'Lo kir rawh' tih chu a chhawp chhuak dawn.

Zorina hla thar tur phuahtu hi tudang ni loin zaithiam Maruati Hnamte a ni a, kum 2014-a a phuah daih tawh kha niin Maruati hian Doordarshan lamah chuan he hla hi a lo sa tawh a, Zorina chuan Maruati'n a demo a thawn tirh aṭanga mawi a tih thu a sawi a ni.

"Pandemic hnu hian mitthi tlaivarnaah solo in kan house band nen kan zai ṭhin a, Pu Lalbiaka boral zan (25.10.21) khan ka zai tlaivar a, Pu Lalbiaka pualin hla hnih min sponsor a, hei hi a hla khatna tur a ni. Hla ka zawnkual laiin he hla hi ka ngaihtuahnaah rawn awm a, Maruati ka va dil a phal takin min lo sak tir a ni," tiin Zorina chuan a hla tihchhuah thar tur chungchang hi Vanglaini a hrilh.

He hla hi misual bo tawh pawh Isua chuan a ngaihdam duh zia leh hlaua beidawng mai tur kan nih lohzia tarlanna hla ṭha tak a ni.

'Lo kir rawh' hi kumina Zorinsanga hla hmasa ber tur a ni a, Zorina chuan a hla chu mite tana malsawmna thlentu nise a duh thu a sawi bawk. Kuminah hian project dang pawh a la nei nual dawn a, music video eng emaw zat a rawn chhawp chhuak turah ngai ang.

Recording chu HC Recording-a a tih niin music chu Lal K Sailo kut chhuak a ni thung a, Milestone Pictures-in video an siam bawk. Video hi uluk takin an siam a, a hla nena inmil thei ang ber turin an duang bawk a ni.