RIAA Gold & Platinum Program-ah Eminem hlate an 'certify' ngun ber

Eminem chu 'King of Gold and Platinum Single' a ni ta e

Detroit rapper Eminem chu Recording Industry Association of America (RIAA) Gold & Platinum program kum 64 lai kalpui a nih chhunga a hlate Gold & Platinum certify tam ber artist a ni tih Thawhlehni khan RIAA chuan an puang.

A hlate RIAA unit maktaduai 73.5 lai a hmuh belh vangin Thawhlehni khan certify thar leh a ni a, RIAA Chairman/CEO Mitch Glazier chuan thuchhuah a siamah,"Eminem chu kan program history-a top certified singles artist a ni ta a, thil thleng khat tak Diamond certify album pathumna a nei thar bawk. Eminem leh a label team zawng zawng kan lawmpui e," tiin a sawi.

Eminem hian a album pathum bakah a single pathum hmangin Diamond award a dawng tawh a, rimawi khawvela a hla leh album-te hralh ṭha ber zinga mi a ni tih a chiang. Maktaduai 73.5 unit a hmuh belh avanga certify a nih leh takah hian RIAA unit a neih tawh zawng zawng chu mtd 227.5 a tling tawh! Tunah hian a 2005 compilation 'Curtain Call: The Hits' album chu Diamond certify thar a ni.

Diamond-certified album nei thei hi artist pasarih chiah an la awm a, Garth Brooks (9), The Beatles (6), Led Zeppelin (5) bakah Eagles, Shania Twain leh Whitney Houston (3 ṭheuh)-te chu niin heng legend zingah hian Eminem hi a tel ve ta a ni.