Dune 2-ah Florence Pugh?

Black Widow star Florence Pugh chu Dune 2-a inlan turin an be mek niin khawthlang media-te chuan an tarlang tlat mai.

Hollywood Reporter-in an tarlan dan chuan Dune novel-a character pawimawh tak Princess Irulan Corrino lema chang turin Florence Pugh hi an bia a, inremna an siam thei a nih chuan Little Women lama a lo thawhpui tawh Timothée Chalamet nen an thawkdun leh dawn a ni.

Dune hi nikum October thla khan tlangzarh a ni a, a chhunzawmna tur hi nakkum October thlaa tlangzarh hman tumin hma an la mek. Dune 2-ah hian Rebecca Ferguson, Josh Brolin, Stellan Skarsgård, Dave Bautista, Zendaya leh Javier Bardem-te chu an inlan leh dawn bawk.

Florence Pugh hi Marvel Series Hawkeye-ah khan inlan lehin Christopher Nolan-a project buaipui mek Oppenheimer-ah Cillian Murphy, Emily Blunt, Robert Downey Jr. leh Matt Damon-te nen an chang ho dawn bawk a ni.