CMA Award 2018 ; Chris Stapleton a ropui ber
Country music huang a chawimawina sem chhuah ṭhin zinga ngaihhlut hlawh ber, Country Music Association (CMA) Award chu Nilaini zan khan Bridgestone Arena, Nashville, Tennessee-ah sem a ni a, American singer Chris Stapleton a ropui ber.
Hetih lai hian Keith Urban chu Entertainer of the Year atan thlan a ni a, Carrie Underwood a langsar viau bawk.
CMA Award-ah hian country singer an fuankhawm ṭha hle a, an hlut tak zet tih a lang. Award ceremony hi Carrie Underwood leh Brad Paisley te chuan an host a ni.
Chris Stapleton kut a hmui
American singer Chris Stapleton chuan award pathum a dawng a, mimala chawimawina dawng hnem ber a ni. Award a dawn te hi - Male Vocalist of the Year, Song of the Year leh Single of the Year te a ni a, tuma tluk rual a ni lo. Chris Stapleton tan kum ṭha tih loh phal chi rual a ni lo a, a thawhrimna chu hlawhtlinnain a zui ta a ni.
Carrie a 'special'
American country singer ropui Carrie Underwood chuan mi bik a nih zia a pholang nawn leh ta a - award ceremony a host bakah chawimawina dawng zingah a tel. Carrie hian award ngaihhlut hlawh ber te zinga mi Female Vocalist of the Year a dawng a, mipa lamah Chris Stapleton chuan a dawng ve thung a ni.
Hetih lai hian New Artist of the Year atan Luke Combs thlan a ni a, a lakah beiseina sang tak mipuiin an nei zui dawn. Album of the Year atan Kacey Musgraves album 'Golden Hour' chu thlan niin, Brothers Osborne chuan Vocal Duo of the Year chawimawina an dawng ve bawk.
Vocal Group of the Year chu Old Dominion niin, Thomas Rhett 'Marry Me' chu Music Video of the Year award hlan a ni. Mac McAnally chuan Musician of the Year award a hum haw ve bawk.
CMA Award 2018-ah hian - Garth Brooks, Luke Bryan, Kenny Chesney, Florida Georgia Line, Miranda Lambert, Brad Paisley leh Bebe Rexha te an perform a, anni bakah hian Chris Stapleton, Carrie Underwood leh Keith Urban te chuan stage an luahlum bawk.
CMA Award 2018 Winner
Female Vocalist of the Year : Carrie Underwood
Male Vocalist of the Year : Chris Stapleton
New Artist of the Year : Luke Combs
Album of the Year : "Golden Hour," Kacey Musgraves
Vocal Duo of the Year : Brothers Osborne
Vocal Group of the Year : Old Dominion
Single of the Year : "Broken Halos," Chris Stapleton
Music Video of the Year : "Marry Me," Thomas Rhett
Musician of the Year : Mac McAnally (Guitar)
Song of the Year : "Broken Halos," Chris Stapleton