Zaninah Awareness 2018 ṭan a ni dawn ta ; Zaithiamten ram leh hnam an vei

Central KṬP in HIV/AIDS leh ruihhlo chungchangah mipuite hnena zirtirna a buatsaih 'Awareness 2018' chu zanin dar 7:00 hian Vanapa Hall-ah ṭan a ni dawn ta.

He hunah hian mithiam sawm bik ten zirtirna an pe dawn a, zaithiam lar tak tak ten ram leh hnam an veizia an auchhuahpui dawn bawk. Zaithiamte hian HIV/AIDS leh ruihhlo avanga Mizo ṭhalaite harsatna tawh chu mangang pui tham a nih thu an sawi a, mutmawh hnarmawhah neih a hun tawh tak zet tih an sawi.

India ram pumah Mizoram hi mihring tam dana chhuta HIV/AIDS kai tamna ber a ni a, ruihhlo a hluar em em bawk. Hei hi Central KṬP chuan hriain 'Awareness 2018' hi a buatsaih ta a ni.

Zaithiam te thuchah chu...

Mizo mipa zinga hriat hlawh ber te zinga mi Andrew Laltlankima'n ṭhalaite hnena thu a chah chu, "Zu leh ruihhlo leh HIV/AIDS laka harsatna tâwkte tan hian Lal Isua hi a ṭha ber a, a la him mekte tan pawh kan himna hmanraw ṭha ber a ni," a ti a. "Kristian ṭhalai rualte hian kan hmanraw ṭha ber Isua kraws i hmang ṭangkai thiam ang u," a ti bawk.

Ruth CVL Muanpuii chuan, "He khawvelah hian chhan nei loin i piang lo tih hria la, khawvel ti mawi a, ti par vul tur hian nangmahah khan thil ṭha tam tak Pathianin a dah a sin! HIV/AIDS avangin harsatna i tawk emaw i la him a nih pawhin Lal Isua nen he kan dam chhungah hian khawvel par ti vul a, amah nen hmang dun turin ka sawm tak meuh meuh che u a ni," a ti.

Mawitei chuan a ṭhalaipuite min vei a, min duhsak a, "Ka ṭhalaipuite zu leh drugs laka fihlim turin leh Lal Isua dah ropui ber turin ka chah tak meuh meuh a ni," tiin ṭhalaite hnenah thu a chah.

The Prophets-a an guitarist leh Praise On 2018-a pakhatna, Electric Vengthlang Branch guitarist Eric Renza chuan, "Ruihhlo hian rah ṭha a chhuah ngai lo; kan theihnain tlin mah se kan thlen tur ang min thlentir thei lotu a ni. Ruihhlo hi HIV/AIDS kai theihna kawng awlsam sialtu lian tak a ni," tiin min chah a, ṭhalaite kawng dik zawh turin a duh hle.

Cindy Lalthanpuii chuan kan ram leh hnamin zu leh ruihhlo avanga harsatna kan tawh nasatzia a hmuh hmaih hauh lo. Cindy chuan, "Zu leh ruihhlo hi kan hnam leh ram min tichhetu lian tak a ni a. Chhungkua min ṭhendarh a, nupa inṭhenna thlen a, fahraha min siamtu lian tak a ni. Kan hnam tlem tê min suat mektu a ni," a ti.

Tlangnuam nula Cindy chuan sawizawmin, "Zu leh ruihhloin a thlen lian tak mai chu HIV/AIDS hi a ni. Nun a pawlawh avangin sex hman mai pawi tih lohna a lian a, inhre chiang hlei lo an inkawp a, chumiin a thlen chu pawi tak a ni tawh ṭhin. Chuvangin kan ram leh hnam a lo dam zel theih nan zu leh ruihhlo lakah hian kan fihlim tlat hi a ngai a ni," tiin ṭhalaite tan ṭan lak a ngaihzia a sawi uar hle.

Ṭhalaite hetiang kawnga kan him theihna ber tur chu Isua a nih thu Duhsaki chuan a sawi. Durtlang nula chuan, "Zu leh ruihhlo hi kan hnam hmelma lian ber a nih avangin i do zel ang u. HIV/AIDS laka i lo him theih nan mipat hmeichhiatna lakah fimkhur turin ka ṭhalaipuite ka chah duh che u a ni; engkimah Isua nen zel aw," tiin ṭhalaite min fuih bawk.

Awareness 2018 hi Zonet Bawhbel, LPS 5 leh Hruaina Êng channel-ah te live-a pek chhuah a ni ang.