'Dark Horse' thubuaiah Katy Perry-i'n thiam chang

Katy Perry chuan 'Dark Horse'-a mi hla copy-a puhna thubuaiah thiam a chang.

Christian rapper Marcus Gray chuan kum 2014-ah daih tawh khan Katy Perry hla hit 'Dark Horse' chu a hla 'Joyful Noise' nen inanna a nei tih sawiin Perry lakah hian copyright infrigment thubuai a thehlut a ni.

Kum 2019-ah khan Los Angeles jury chuan Katy Perry 'infringement'-a puh theih a nih thu lo sawi tawh mah se kum 2020-ah khan a copy nia sawi eight-note “ostinato” chuan originality neia pawm tura danglam bikna a neih loh thu sawiin, copyright hnuaia venhimna nei turin a ṭha tawk lo tih an sawi.

Chumi kumah vek chuan Gray chuan thubuai thehlut lehin hla pahnih inanna chungchang hrang hrang a ziak a, mahse Ningani khan court chuan Katy Perry chu thiam a chantir ta tho a ni. Perry hian thiam loh chang se chu $maktaduai 2.8 thlengin a chawi a ngai dawn a, mahse chu chu a pumpelh ta a ni.