'The Batman' tlangzarh hnuah Nirvana 'Something in the Way' stream a pung nasa

Kar hmasa lawka tlangzarh tak 'The Batman' film vang khan Nirvana classic 1991 album 'Nevermind' chu nasa takin stream a pung tih MRC Data chuan a tarlang.

DC film Robert Pattinson channa 'The Batman' film hi March 4 khan tlangzarh a ni a, Box Office lamah pawh a che ṭha rem rem hle. He film-ah hian Nirvana hla 'Something in the Way' chu soundtrack atan an hmang a, film-ah vawi hnih lai an tihrik bakah trailer lamah pawh an tiri tel bawk. Trailer-a an tihrik avang ringawt khan September 2020 khan a vawi khatna atan Billboard chart lamah pawh a lang leh a, Rock Digital Song Sales chart-ah No.2 a nih hial bakah all-genre Digital Song Sales ranking-ah pawh 45-na a ni bawk.

Cinema Hall lama en theih tura an tlangzarh hnu khan he hla hi US lamah chuan an stream nasa nghal hle a, MRC Data-in a tarlan dan chuan February 28 kha chuan vawi 72,000 chiah stream a nih laiin March 8 khan chuan ni khatah vawi maktaduai 1.6 zet stream a ni tawh. Stream pun chak zawng hi 734% a tling pha hial a, Spotify Daily USA Top 50 song rangking-ah pawh top 5-ahte a inhlangkai leh phak a ni.

'Something in the Way' awmna album 'Nevermind' hi tlangzarh a nih tirhah pawh khan a lar rem rem hle a, kum 1992 khan Billboard 200 chart No.1 te pawh a lo ni zak zak tawh.

'Something in the Way' stream pun chhoh dan (MRC Data):-
Feb. 28 : 72,000
March 1 : 78,000
March 2 : 99,000
March 3 : 123,000
March 4 : 291,000 (Tlangzarh ni)
March 5 : 505,000
March 6 : 808,000
March 7 : mtd 1.5
March 8 : mtd 1.6