Kristian rimawi ; For KING & COUNTRY-in album thar an drop

Grammy award hial pawh dawng tawh Kristian rimawi huanga duo lar For KING & COUNTRY chuan an album thar, mi tam takin an nghahhlelh em em 'What Are We Waiting For?' chu Zirtawpni liam ta khan an tlangzarh.

'What Are We Waiting For?' hi Australian Christian pop duo For King & Country studio album pangana a ni a, Word Entertainment kaltlanga an tlangzarh niin he album-ah hian Luke Smallbone leh Joel Smallbone-te chuan zaithiam hrang hrang an thawhpui a, chung zingah chuan Dante Bowe, Sleeping at Last, Tori Kelly, leh Kirk Franklin-te pawh an tel a ni.

Nikum lama single-a an tihchhuah pahnih 'Relate' leh 'For God Is with Us'-te pawh kha he album-a mite hi niin 'Relate' phei chu tlangzarh a nih tirhah khan US Hot Christian Songs chart lamah pakhatnate a ni hial tawh nghe nghe.

'What Are We Waiting For?'-ah hian hla 13 a awm a, streaming platform hrang hrangah stream theihin an chhawp chhuak tawh a, Zirtawpni khan an album thar tihchhuah pah hian an album-a hla pakhat 'Broken Halos' Official Music Video chu an tichhuak tel nghal bawk.

An album thar tihlarna tur hian United States hmun hrang hrangah 'What Are We Waiting For? – The Tour' an nei nghal dawn a, thla tawp aṭang hian tour hi an ṭan nghal dawn a ni.

What Are We Waiting For?-a hla awmte:-
1 RELATE
2 Broken Halos
3 Love Me Like I Am
4 Unity (feat. Dante Bowe)
5 For God Is With Us
6 Hold On Pain Ends
7 Unsung Hero
8 Harmony (feat. Sleeping At Last)
9 Shy
10 TOGETHER (feat. Kirk Franklin & Tori Kelly)
11 Seasons
12 Cheering You On
13 Benediction