Khawvela car sei berah Swimming pool leh helipad an dah!

Khawvela car sei ber record chelh mektu 'The American Dream' tia a hming an vuah-ah chu an thawm ṭhat belh leh a, tunah chuan swimming pool, golf putting green leh helipad a awm tawh!

Guiness World Record chuan an Twitter accout kaltlangin hemi chungchang hi an puangzar a, a thlalak an tarlang tel bawk.

Khawvela car sei ber record chelh mektu super limo 'The American Dream' hi metre 30.54 (ft. 100 leh inches1.50) zeta sei a ni a, hetiang car ho hi a tlangpuiin ft 12-16 vel a ni ṭhin. He car hi kum 1986-a an siam kha niin California-a Burbank-ah an siam, car customiser Jay Ohrberg kut chhuak niin a tirah chuan ft. 60 a sei a nih bakah ke 26 a nei a, a hma leh a hnungah V8 engine a hmang bawk. Mahse chumi hnuah chuan an chei ṭha leh a, tunah chuan metre 30.54 zeta sei a ni ta a ni.

'The American Dream' car hi 1976 Cadillac Eldorado limousine ang deuha siam niin lehlam lehlamah a khalh thei a, refrigerator, telephone leh TV eng emaw zat a chhungah awmin Guiness World Records lamin an tarlan dan chuan mi 75 an chuang thei.