Dawngkimi'n a music video hmasa ber 'A hnen pan la' a peih fel ta

Mizo Idol star Mal­sawmdawngkimi chuan a music video hmasa ber 'A hnen pan la' tih chu a peihfel ta. A official music video hmasa ber hi vawiin hian MDM libray-ah dahluh a ni dawn a, Zonet local channel lamah hmuh tur a awm thuai dawn a ni.

Mizo Idol Season 6-a mipui ṭan hlawh tak Dawngkimi hian rimawi khawvelah sang tak thlen a tum a, chumi tur chuan hma pawh a la mek. A hma hruai atan music video a rawn chhawpchhuak a, hmachhawp pawh a nei nual a ni. Nakkum lamah music video 'hot' tak tihchhuah a tum a, hei pawh hi ngahhlehawm tawh tak a ni.

Tun ṭuma a music video pawh hi a 'hit' hle tura ngaih a ni a, beiseina pawh a sang hle. A hla hi Malsawmtluanga phuah niin, Dawngkimi hian a sa nalh hle. Music track leh recording hi rimawi lama sulhnu nei ṭha tak Blue Wave ten an siamsak a, belhchian a dawl hle dawn a ni. Video hi Liantluang Pictures siam sak a ni thung a, mit a tlai dawn hle bawk a ni.

Kolasib nula Dawng­kimi hi Mizo Idol neih zawh takah khan top 10-ah a lang a, a zai thiam em avanga mi ṭan rawn a ni. Mizo Idol intihsiak a zawh hnuah pawh sawm hlawh zui ber te zinga mi niin, hmun hrang hrangah zaiin a chhuak nasa hle. Heti chunga a zai ngainatute tana music video a chawpchhuah sak thei hi a lawmawm hle a ni.