Ranveer leh Deepika ten lawmpuitu an ngah

Italy-ah hun hlim­awm tak an hman hnu­in, Ranveer Singh leh Deepika Padukone te chu India-ah an lo kir leh ta. Bollywood star te hian lawmpuitu an ngah hle a, Mumbai airport-ah mi tam takin an lo hmuak a ni.

Italy aṭangin Mumbai-ah
Bollywood star Ran­veer Singh leh Deepika Padukone te hi November 13-14 khan Italy-a Villa del Balbianello, Lake Como-ah an innei a, an hnam dan ve vein an inkutsuih. He hun hi an chhungkhat laina hnai zual bakah, an ṭhenrual ṭha sawm bik ten an hmanpui a ni.

An inkutsuih zawh hnu hian Italy aṭangin India-ah an rawn let a, nimin zing khan Mum­bai an thleng a ni. An mahni lawmpuitu mi tam tak chu Mumbai airport-ah hian an pung­khawm a, mipuiin an chim buai lohna turin ven­himna pawh khauh taka kenkawh a ngai hial a ni.

Sum an seng hnem
An inneihna hmun Villa del Balbianello hi tuipui kama awm niin, tunlai hmanraw changkang tak hmanga cheibawl a ni. Room pawh a tam hle a, pakhat luah man hi India pawisa chuan Rs. 33,000 zel a ni. He resort changkang takah hian November 17 thleng khan hun an hmang a, ni khata an senso ringawt pawh Rs. 24,75,000 a ni. Italy-a an chham chhunga an senso hi vaibelchhe khat chuang daih a ni a, India-ah pui tham taka lawm leh an la tum cheu bawk a ni.

An inneihna hmunah hian official bak chu thlalak phalsak an ni lo a, an inneih thlalak pawh hmuh tur a la tam lo hle a ni. November 21 hian Bengaluru-ah a lawmna hran buatsaih a ni leh dawn a, hei bakah hian an ṭhian milar tak tak te pualin November 28 khian Mumbai-ah a lawmna hran an la buat­saih leh dawn bawk a ni.

Ranveer leh Deepika te hian lawmpuitu an ngah hle a - Karan Johar, Alia Bhatt, Katrina Kaif, Anushka Sharma, Abhishek Bachchan, Preity Zinta leh milar tam takin lawmpuina leh duhsakna an hlan a ni.