Voltas Malsawm House Ṭhazual Lengzem ; Marina Varte 'Pi Pu nunmawi' a mawi ber

Voltas Malsawm House Ṭhazual Lengzem chart-ah Marina Varte 'Pi Pu nunmawi' chu pakhatna a ni a, Elena HT Par chu pahnihna niin HT Lalthanzami chu pathumna a ni ve bawk.

Marina Varte 'Pi Pu nunmawi' a mawi ber
Marina Varte 'Pi Pu nunmawi' hi chart hmasa lamah kha chuan palina a ni a, tunah chuan pakhatnaah a rawn invawrh ta a ni.

Mizo Idol star Marina Vanhriatpuii Varte hian 'Pi Pu nunmawi' hi thla hmasa khan a tichhuak a, he hla hi Sappuithanga phuah niin Kima Chhangte chuan music a siam sak a, Hebron Picture kut chhuak video hmuh nuam tak nen a tichhuak a ni. A sak thiam zawng tak a ni bawk a, chart-ah pawh hma a sawn chak a, pakhatna pawh a ni har lo khawp mai.

Pahnihna leh pathumna
Elena HT Par chuan RP-a Ralte hla phuah thiam taka a sak 'Kha ni kha' hmangin chart-ah hma a hruai teuh tawh hle. Pahnihna a ni der tawh a, he hla hi YouTube lamah pawh thlirtu an pung chak a, pakhatna ni tur pawhin a dinhmun a ṭha sawt hle.

Pathumna chu chart-a che ṭha ṭhin tak HT Lalthanzami niin a hla 'A der mai maw' chu top 3-ah a rawn inhlankaipui ve bawk a ni.

Chart a hot
Jt Production hla mawi tak leh tunlaia lar em em mai 'A thuk tawh' chu palina a ni a, Michelle Varte chuan 'Nachhawkna' chu pangana a nihpui leh bawk a ni.

Fela Colney, Lowdy ft.JT Production, Awmtea Polymer ft KR Robert, Apuii Chhangte leh PC Lalnunpuii-te pawh chart-ah an lang a ni.

Ṭhazual Lengzem chart top 10:-
1 Marina Varte Pi Pu nunmawi
2 Elena HT Par Kha ni kha
3 HT Lalthanzami A der mai maw
4 Jt Production A thuk tawh
5 Michelle Varte Nachhawkna
6 Fela Colney Pu Ralliantawna kha
7 Lowdy ft.JT Production Hun
8 Awmtea Polymer ft KR Robert Mi vakvai
9 Apuii Chhangte Valmawi
10 PC Lalnunpuii Min hersan le