Fiamthu thiam Lalnunsanga a fam ta

A fiamthu hmanga Zofate min tihlima min nuihtir ṭhintu Lalnunsanga chu nimin chhun dar 12:15 khan Civil Hospital, Aizawlah kum 43 mi niin a thi.

Lalnunsanga hi March 1 zanah khan a chesual nia sawi niin a lu a sawh a, chumi hnu chuan damdawi-in lamah enkawl niin nimin chhunah khan a boral ta a ni. A thih thu puanzar a nih hnu lawk hian uina thu chhiar tur a tam a, mi tam takin social media lamah an ui thu an tarlang nasa hle.

Fiamthu intihsiakna LPS Comedian Search aṭanga kan hmelhriat Lalnunsanga hi kum 2010, 2011 leh 2012-ahte khan tel vekin, pakhatna ni lo mah se mi lawm ber pawl a ni chho char char a, kum 2013-ah khan tel lehin hemi kumah zet hi chuan tuma tluk rual lohin pakhatna a ni ta a ni. Rotluanga (Mapuia) chuan,"Hemi kuma a thil dawn hi Comedian Search buatsaih tawh zawng zawnga sum leh thilpek dawng hnem ber a ni hial a ni. Ding chunga fiamthu thawhah chuan Mizo zinga aber zinga mi tih loh theih loh a ni e. Chawp leh chilha mi han chhanlet dan thiam, thluak ṭha eltiang a ni tih hi sawi nawn ngai lovin a dinchhuahna hmu tawhtute chuan an nemnghet vek ngei ang," tiin a sawi hial.

Lalnunsanga ruang hi nizanah khan tlaivarpui a ni a, vawiin lamah hian vui a ni ang.

Fiamthu Huang leh Mapuia tia kan hriat lar Rotluanga chuan, "Comedian Arsi eng bik Lalnunsanga a liam ta. A fiamthu bungraw hman hlimawm leh a sawi chhuah dan a thiam chungchuan avanga mi ngainat rawn. Mizovin Fiamthu thiam hming an sawi a, a hming an sawi hmaih tawh loh tur; Arsi eng bik Lalnunsanga a her liam ta. Zoram mipui fiamthu ngainatute leh Fiamthu huang (FTH) chhungkaw tan chuan hei baka channa nasa a awm chuang lo," tiin niminah khan Lalnunsanga thih thu hi an puangzar a ni.