Hontrade International Ṭhazual Fakna ; A zawna dinhmun sang ber luah thei Grace Lalchhanhimi

'Rinna mitin ka thlir ṭhin' tih hla hmanga vawi eng emaw zat No.1 lo hauh tawhtu, Grace Lal­chhan­himi chuan Hontrade International Ṭhazual Fakna chart-ah dinhmun sang ber a rawn luah leh ta.

Grace-i hian a hla thul­khung hmang hian chart hmasa lamah khan pakhatna a lo hauh tawh a, tun ṭumah pawh tuma tluk rual lohin a dinhmun ngai a rawn luah leh ta a ni.

Hmeichhe zinga Mizo Idol ni thei hmasa ber Grace-i hian September thla khan music video changtlung tak mai a tichhuak a, chart-ah pawh hmun pawimawh a luah nghal chat. Mipuiin a zai ngaihtlak an la kham lo tih a lang a, tun lai fakna hla thlan hlawh ber a ni.

'Rinna mitin ka thlir ṭhin' tih hla hi Rev. Zoramsanga lehlin niin, music leh recor­ding hi Blue Wave Record kutchhuak niin, mit leh beng a tlai hle. Video mawi tak mai hi Siama Video Production (SVP) kutchhuak niin, kumina Grace-i music video hmasa ber a ni.

Tun ṭum chart-ah hian Hlimhlimi chuan 'Min pui ang che' tih hla hmangin pahnihna a hauh a, Jennie Lalruatfeli chu pathumna a ni. Hlimhlimi hi Ṭhazual Award 'Best Female Artist' nihna chelh mektu a ni a, chart-ah pawh a mikhual lo hle. Jennie Lalruatfeli pawh chart-ah No.1 lo hauh zak zak tawh a ni a, a hla thar 'Thuneihna I ta' hmangin a rawn inlar leh mek.

Tun hnaia music video tichhuak - Amtea leh Henry Varte te chu top 5-ah an inhlangkai bawk. Amtea hian 'Engkim ka hlan a che' tih hla hmangin palina a hauh a, 'A sawm che' tih hla nen Henry Varte a inlar zui zel bawk.

Stacy a inlar
Mizo hmeichhe zai­thiam zinga hriat hlawh ber te zinga mi Stacy V.L. Muan­puii chuan mi bik a nih zia a rawn lantir leh mek a, Hontrade International Ṭhazual Fakna char top 10-a lang pha hla pahnih a nei hial. Stacy hian tun hnaiah hla thar pahnih - Kan hneh zel dawn tih leh Thlen ka nghakhlel tih hla te a tichhuak a, a zai ngainatu an la tam hle tih a lang.

Stacy hian album a buai­pui mek a, chuta dah tur hla ṭhenkhat chu a lo tichhuak lawk a ni. Lung­muana Chhangte hla phuah 'Kan hneh zel dawn' tih hi September thla khan a tichhuak a, October thla tawp lam khan 'Thlen ka nghakhlel' a tichhuak leh bawk. He hla hi Andrew Laltlankima phuah niin, Stacy hian hnehsawh takin a sa a ni.

Top 10-ah hian R. Lalrin­mawii (Arini), Sawmtea Chhangte leh C. Vanlalduati te an lang bawk. Hontrade International Ṭhazual Fakna chart-ah hmel thar hmuh tur an awm chho zel a, Kris­mas hla lam pawh hmuh tur a awm thuai a rin­awm. Zaithiam ṭhenkhat chuan music video pawh an tichhuak leh tawh a ni.

Hontrade International Ṭhazual Fakna Top 10
1. Grace Lalchhanhimi - Rinin ka thlir ṭhin
2. Hlimhlimi - Min pui ang che
3. Jennie Lalruatfeli - Thuneihna I ta
4. Amtea - Engkim ka hlan a che
5. Henry Varte - A sawm che
6. Stacy V.L. Muanpuii - Kan hneh zel dawn
7. Stacy V.L. Muanpuii - Thlen ka nghakhlel
8. R. Lalrinmawii - Lalpa ka rawn pan che
9. Sawmtea - Ka awin Pathian chu ka au va
10. C. Vanlalduati - Tui chungah