Tom Hardy an chawimawi

British lal chhungkua chuan English actor Tom Hardy chu film lama a thawh hlawk avangin Commander of the British Empire (CBE) nihna an hlan.

Tom Hardy chawimawina hun hi Buckingham Palace-ah buatsaih a ni a, Prince Charles chuan CBE nihna hi a hlan a ni. A rual hian author Ken Follett chu CBE nihna hlan a ni bawk a, TV historian Lucy Worsley chu Order of the British Empire (OBE) hlan a ni bawk.

Hollywood star Tom Hardy hi Prince William leh Prince Harry te ṭhian hnai tak a ni a, kumin May thla-a Harry leh Meghan Markle te inneih ṭum pawh khan a inlan a ni.

Hetih lai hian Ken Follett hi literature lama a thawh hlawk avangin chawimawina hi hlan a ni a, novel lar tak tak - The Pillars of the Earth, World Without End leh Century Trilogy te a lo ziak tawh a ni. Lucy Worsley pawh hi a hna thawh ropui tak avangin OBE hi hlan a ni bawk.