'The Batman' a la thlawk sang zel ; BTS pawh an rawn inlan e
Box Office chart-ah 'The Batman' bawkin ro a rel chhunzawm a, chutih rual chuan BTS concert film chu chart top 3-ah rawn inhlangkaiin record a siam.
'The Batman' sum lakluh a la tam
Caped Crusader chuan Gotham khawpui chauh a hrut lo, khawvel ram hrang hrang rawn hrut kualin sum pawh a lalut hnem tawh hle.
Robert Pattinson channa 'The Batman' hi kar tawp liam ta chhung khan North America theatre 4,417-ah chhuah a ni a, $66,511,221 lai lalut lehin sum lalut tam ber a ni. A sum lakluh hi a tam fal a, US-ah ringawt $239,032,047 a lalut der tawh. US pawn lam aṭangin $226,800,000 lalut tawhin ram hrang hrang aṭanga a sum lakluh belhkhawm chu $465,832,047 lai a ni tawh bawk.
Film review-tu lamin an fak rawn Matt Reeves kut chhuak 'The Batman' hi kumin chhunga film tlangzarh zingah chuan sum lalut tam ber dawttu a ni ta a, khawchhak film 'The Battle at Lake Changjin II' chiah tluk tawh loin tun ang renga a sum lakluh a pung chak chho a nih chuan he film pawh hi a khum thuai dawn tih a chiang.
Pahnihna chu Tom Holland-a channa 'Uncharted' kha ni thungin 'The Batman' nen hian an sum lakluh a inthlau rem rem hle a, theatre 3,725 aṭangin $9,252,677 a lalut leh a ni.
Chutichuan, BTS an rawn lang e
'BTS Permission to Dance on Stage - Seoul: Live Viewing' chu Box Office-ah pathumna a rawn ni a, theatre 803-ah chiah chhuah ni mah se $6,840,000 lai sum a lalut. US pawn lama an chhuahna zawng zawng nen chuan theatre 3,711-ah chhuah a ni a, chung theatre zawng zawng aṭanga a sum lakluh chu $32,600,000 lai a ni.
BTS hian US-a Live cinema event awm tawh zawng zawnga sum lalut tam ber record an siam bawk niin The Hollywood Reporter chuan a tarlang.
Film thar
Box Office Mojo Chart-ah film 50 tarlan a ni a, film thar lian tham tlangzarh ni lo mah se film thar erawh a awm ve nual. Radhe Shyam(7), Tyson's Run (13), All My Friends Hate Me (27), I am Here (29), The Cherry Bushido (35) leh Ultrasound (42)-te chu film thar an ni.
Box Office top 10:-
1 The Batman $66,511,221
2 Uncharted $9,252,677
3 BTS Permission to Dance $6,840,000
on Stage - Seoul: Live Viewing
4 Dog $5,212,197
5 Spider-Man: No Way Home $4,050,047
6 Death on the Nile $2,425,894
7 Radhe Shyam $1,860,000
8 Sing 2 $1,606,270
9 Jackass Forever $1,088,899
10 Scream $469,394