Fantastic Beasts: The Crimes of Grindelwald a ropui

November 16-a tlangzarh Fantastic Beasts: The Crimes of Grindelwald chu US box office-ah a cheṭha hle a, Zirtawpni-a tlangzarh mah ni se, tlangzarh a nih karah hian Box office-a sum lalut hnem ber a ni thei nghal.

Fantastic Beasts: The Crimes of Grindelwald hi Fantastic Beasts and Where to Find Them chhun­zawmna niin, JK Rowling-i leh­khabu ziah behchhana siam a ni leh a, Harry Potter-a te Wizarding World nena inzawm veka siam a ni.

He film-ah hian Eddie Redmayne, Katherine Waterston, Dan Fogler leh Alison Sudol-te chu chang lehin Jude Law leh Johnny Depp-te hmel pawh hmuh tur a awm.

Film siam nan hian $200 million hman a ni a, Pathianni thleng khan US-ah chuan $62 million chuang a lalut tawh a, khawvel pumah erawh $253.7 million a lalut tawh thung. Pathianni khan $15 million a lalut a ni.

Sum lalut tam ber dawttu chu The Grinch niin Pathianni khan $12 million a lalut a ni. The Grinch hi Cartoon a ni a, 2000 kumah khan Jim Carrey leh Rock Band lar tak 'The Pretty Reckless' Vocalist ni ta Taylor Molmsem-te chuan a cartoon loin an lo chang tawh bawk.

Pathumnaah chu Bohemian Rhapsody a ni thung a, Mizote zingah chuan sawi tam vak ngai lo khawpa kan hriat lar Queen vocalist Freddie Mercury chanchin chan chhuahna film hian hlut a hlawh hle a ni.