BTS 'V' Solo Mixtape kumin chhungin?

Bangtan Boys member V chu a solo music thar tichhuak turin a inring tawh hle. Nilaini khan hemi chungchang hi sawiin kumin chhungin a solo mixtape tihchhuah a tum thu a sawi.

K-pop singer hi Korean media platform Weverse-ah inlanin zawhna hrang hrang a chhang a, chutah chuan a solo music tur chungchangte pawh a tel a ni. Hetah hian a solo music chu kuminah chuan tlangzarh a tum thu hi a sawi niin Billboard chuan a tarlang.

V hian thla liam ta hun eng emaw chen aṭang khan a solo music tur chungchangah hian thawm a lo nei tawh a, 'Christmas Tree' pawh a lo tichhuak tawh a nih kha. Kha hla kha Billboard Hot 100 chart lamah pawh 79-na a nihpui bakah Holiday 100 chart lamah 55-na a nihpui bawk.

Weverse-ah hian a fan-te chuan a solo tihchhuah tur hoah chuan a hla lo tihchhuahte an tel leh dawn em tih an zawhna chu chhangin an tel dawn lo mai ni loin, a delete vek tawh niin a sawi.

"Ka hla tihchhuah tawh zawng zawng kha mixtape-ah an tel dawn lo, ka upload zawh hnuah khan ka delete vek a ni," a ti.

V hian Rolling Stone-in an kawmnaah nikum chhunga a solo project chu tihchhuah hman a tum thu leh BTS lama insawrbing a duh vanga a tlangzarh hman dawn loh thu a lo sawi tawh a ni.

"A tirah tak chuan nikuma tihchhuah kha ka tum. Mahse ka beisei leh ka rin phak bakin thiltih a harsa. Chuvang chuan kumin hian ka tlangzarh ang tiin rilru ka siam leh a, mahse a ngai te bawkin, ka rin aiin thiltih a harsa leh ta zel a! Chuvang chuan kumin kum tawpah hi chuan ka tlangzarh ka beisei," tiin nikum May thla khan Rolling Stone a lo hrilh tawh a, mahse chupawh chu a tihlawhtling hman ta lo a ni. Weverse-a a inlana a sawi erawh tihlawhtling ngei tawh se a fan-te chuan an ti hle ang.

Hetih mek lai hian V hi tunah chuan BTS concert tur atan nasa takin a inbuatsaih mek a ni. BTS hi April 8,9,15 leh 16 hian 'Permission to Dance On Stage' tour neiin Allegiant Stadium, Las Vegas-ah an inlan ang.