Hillsong TAYA single hmasa ber 'For All My Life'

Hillsong United member Taya chuan Zirtawpni khan ama puala a single hmasa ber 'For All My Life' chu a tichhuak.

UNITED RIAA Certified Multi-Platinum global worship anthem 'Oceans (Where Feet May Fail)' kha mi tam tak chuan kan hriain a rinawm. Kha hla tihchhuah a niha a lar zia leh vawiin thlenga mi tam tak rilru hnehtu hla a la nihzia pawh sawi duah a ngai awm lo e. Kha hla aṭanga khawvelin a hmelhriat Taya chuan Zirtawpni khan a single hmasa ber 'For All My Life' chu a tichhuak a, he hla hi a album tihchhuah tur aṭanga a single hmasa ber a ni nghe nghe.

Taya hian Captol CMG hnuaiah May 27 hian a album hmasa ber a tichhuak dawn a, chumi khuh hawnna atan chuan 'For All My Life' hi a hmang ang. He album-ah hian hla 14 a awm a, tunah hian pre-order theih a ni tawh.

'For All My Life'hi Hank Bentley nena an phuah dun niin, thil kan hriat chian lohah pawh Pathian rintlak zia leh Pathiana innghahtur a nihzia puanchhuahna hla a ni. Music video-ah chuan Taya naupan lai bedroom, Lismore, Australia-a mi pawh hmuh tur a awm.

Taya chuan,"He hla hi ka record tura kan hla phuah hnuhnung ber a ni. A hla thu ka ennawn hian, ka testimony thluk neia siam a ni tih ka hre chhuak. Eng hun pawh nise Pathian chu a rinawm a ni tih tarlanna a ni a, ka nun innghahna hla, ka dam chhunga ka sak tawh tur a ni," a ti.

Taya Smith Gaukrodger hi Australian Gospel singer a ni a, Hillsong United ngainatute tan chuan inhmelhriattir vak a ngai tawh awm lo e. Tunah hian kum 32 lai a ni ve tawh a, Hillsong United hla hit 'Oceans (Where Feet May Fail)' a sak aṭang khan mi tam ber chuan kan hmelhriat ṭanin a rinawm. Kha hla kha a hit rem rem hle a, Billboard Top Christian Songs Chart-ah phei chuan kar 61 lai pakhatna niin record a siam hial a ni.