April thla tawpah G'Nie Vs Papuia

G'Nie kan hria, rapper a ni. Papuia Pachuau pawh kan hria, lemchan thiam a ni. Tun ṭumah erawh Boxing ring chhungah heng mi pahnihte hi kan hmu dawn.

Mizo entertainment khawvela hriat hlawh tak pahnih, an kawng zawng inang lo tak takte hi ring chhungah an intawng dawn a, April 29 hian an inhnek dawn a ni.

K&P Entertainment chuan a vawi khatna leh a hmasa ber ni turin, G'Nie leh Papuia-te chu ring chhungah an intawn tir dawn a, a hmuhnawm ang. "He match hi ennawm satliah atan emaw, phur thut thil tih ni loin, a intum turte hian hun engemaw chen chu Professional trainer hnuaiah training an lo kalpui tawh a ni," tiin Vanglaini palai an hrilh a, rin aiin an theuneu lo viau dawn niin a lang.

He boxing match hi professional bout a ni anga, professional boxer-te'n an dan zawm ṭhin zawng zawng leh fight round chenin anni pahnih inhnek turah hian hman a ni ang.

Zoram pawn thlenga thawm leh huhang nei nghah tak an nih avangin K&P Entertainment chuan khawvel kil tin aṭanga en theih turin chhawp chhuah an tum bawk a ni.